នាឱកាសបុណ្យចូលឆ្នាំខ្មែររយៈពេល ៣ថ្ងៃកន្លងទៅនេះ ខេត្តសៀមរាប ទទួលភ្ញៀវទេសចរជាតិ និងអន្តរជាតិ ប្រមាណជាង ១.៦លាននាក់។ នេះបើយោងតាមការប៉ាន់ស្មានរបស់លោក ថោង ខុន រដ្ឋមន្រ្តីក្រសួងទេសចរណ៍។

ចំនួនភ្ញៀវទេសចរ មកកម្សាន្តនៅខេត្តសៀមរាប ឆ្នាំនេះ គឺមានកើនឡើងប្រមាណ ២៥ភាគរយ បើធៀបនឹងឆ្នាំ ២០១៦ ដែលមានភ្ញៀវទេសចរជាង ១.៣លាននាក់។

លោក ថោង ខុន បានបន្ថែមថា ព្រឹត្តិការណ៍អង្គរសង្រ្កាន្តនេះ ទាក់ទាញទាំងភ្ញៀវជាតិ​ និងអន្តរជាតិ ព្រមទាំងជួយផ្សព្វផ្សាយនូវ វប្បធម៌ប្រពៃណីខ្មែរ ហើយមានការលេងល្បែងប្រជាប្រិយ របាំ និងសកម្មភាពសិល្បៈជាច្រើនទៀត។

គួររម្លឹកដែរថា ត្រឹម ២ខែ ដើមឆ្នាំ ២០១៧នេះ ខេត្តសៀមរាបទទួលបានភ្ញៀវទេសចរអន្តរជាតិ ប្រមាណ ៥៣ម៉ឺននាក់ ដែលស្មើនឹង ៤៥ភាគរយនៃចំនួនភ្ញៀវទេសចរអន្តរជាតិមកកម្សាន្តនៅកម្ពុជា៕