ប្រទេសជប៉ុន គ្រោងនឹងចំណាយទឹកប្រាក់ ១០០លានដុល្លារអាមេរិក ដើម្បីស្ថាបនាអាងពិពណ៌ចិញ្ចឹមត្រីដ៏ធំមួយ នៅកម្ពុជា។ នេះបើយោងតាមគេហទំព័រ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។

គម្រោងនេះ គឺមានផលទាក់ទាញភ្ញៀវទេសចរផង និងសម្រាប់ការសិក្សាស្រាវជ្រាវត្រីទឹកសាបគ្រប់ប្រភេទ នៅតាមបណ្តោយបឹងទន្លេសាប និងទន្លេមេគង្គផង។

អាងចិញ្ចឹមត្រីនេះ មិនត្រឹមតែទាក់ទាញភ្ញៀវទេសចរប៉ុណ្ណោះទេ គឺផ្តល់ឱកាសឲ្យប្រជាជាតិទាំងក្នុងតំបន់ និងអន្តរជាតិអាចមកសិក្សាស្រាវជ្រាវពូជត្រី ការភ្ញាស់ និងថែរក្សាពូជត្រីទឹកសាបនៅកម្ពុជាផងដែរ។

លើសពីនេះទៅទៀត គម្រោងនេះ រំពឹងនឹងទាក់ទាញភ្ញៀវទេសចរបានច្រើន បន្ទាប់ពីប្រាសាទអង្គរវត្តដ៏ល្បីល្បាញ។

គួរបញ្ជាក់ដែរថា គម្រោងនេះ ត្រូវបានស្វាគមន៍ពីសំណាក់រាជរដ្ឋាភិបាលកម្ពុជា ហើយក៏បានជំរុញឲ្យចេញជារូបរាងប្រកបដោយជោគជ័យផងដែរ៕