នាវាទេសចរណ៍របស់ហូឡង់ ដែលមានឈ្មោះថា Volendam បាននាំយកភ្ញៀវទេសចរណ៍ប្រមាណជា ១២០០នាក់ មកទស្សនាប្រទេសកម្ពុជា។ នេះបើយោងតាមគេហទំព័រ រដ្ឋបាលខេត្តព្រះសីហនុ ចេញផ្សាយកាលពីម្សិលមិញនេះ។

នាវាទេសចរណ៍នេះ បានចូលចតនៅកំពង់ផែស្វ័យត ក្រុងព្រះសីហនុ បន្ទាប់ពីចាកចេញពីប្រទេសថៃ មកកាន់ព្រះរាជាណាចក្រកម្ពុជា ដោយមានផ្ទុកភ្ញៀវទេសចរណ៍ចម្រុះជាតិសាសន៍ ១២៣៣នាក់ មាន ៣៧សញ្ជាតិ និងមាននាវិកចំនួន ៦២០នាក់ មាន ២៨សញ្ជាតិ។

សម្រាប់ភ្ញៀវទេសចរណ៍ ដែលមកធ្វើដំណើរកម្សាន្តច្រើនជាងគេគឺ ជនជាតិអាមេរិក ៣៨៧នាក់ ជនជាតិកាដាណា ២៥៦នាក់ និងជនជាតិអង់គ្លេស ១៧០នាក់។

គួរបញ្ជាក់ដែរថា ត្រឹម ៩ខែ ដើមឆ្នាំ ២០១៦ នាវាទេសចរណ៍ ២៩គ្រឿង បានចូលចតនៅកំពង់ផែអន្តរជាតិព្រះសីហនុ ដែលនាំយកភ្ញៀវទេសចរណ៍បរទេសប្រមាណ ៤ម៉ឺននាក់ មកទស្សនាប្រទេសកម្ពុជា៕