ក្រុមហ៊ុនកម្ពុជា Urban Living Solutions និងក្រុមហ៊ុនក្រៅស្រុក គ្រោងនឹងចំណាយថវិកាប្រមាណជាង ១០លានដុល្លារអាមេរិក សាងសង់អគារស្នាក់នៅរួម ដែលនឹងបើកការដ្ឋានសាងសង់ក្នុងខែ មេសា ឆ្នាំ ២០១៧ខាងមុខនេះ។
លោក លឹម សុជាតិ តំណាងអ្នកវិនិយោគក្នុងស្រុកបានមានប្រសាសន៍ថា ដោយសារការរីកចម្រើននៃកំណើនសេដ្ឋកិច្ច ក៏ដូចជាកំណើនការអភិវឌ្ឍលើវិស័យផ្សេងៗ បានជំរុញឲ្យ រាជធានីភ្នំពេញក្លាយទៅជា តំបន់ប្រជុំនៃការិយាល័យ ស្ថាប័នឯកជន ការិយាល័យស្ថាប័នរដ្ឋ និងអង្គការក្រៅរដ្ឋាភិបាល ដែលជាកត្តាទាក់ទាញស្រូបកម្លាំងពលកម្មពីក្នុងទីក្រុង និងតាមបណ្តាខេត្តនានា។
តាមរយ:ការស្រាវជ្រាវគឺ ប្រជាជនភាគច្រើនជួលផ្ទះ ឬស្នាក់នៅជាមួយបងប្អូន ដោយសារអចលនទ្រព្យនៅរាជធានីមានតម្លៃថ្លៃ ដែលដូច្នេះគម្រោងនេះធ្វើឡើង ដើម្បីឆ្លើយតបទៅនឹងតម្រូវការនឹងជួយសម្រួលដល់ផលវិបាករបស់ពួកគាត់។
លោក លឹម សុជាតិ បានបន្តបន្ថែមទៀតថា ក្នុងដំណាក់កាលទីមួយនៃ ការដ្ឋានសាងសង់ផ្ទះមានប្រហែល ៦០០ខ្នង សង់លើផ្ទៃដីជាង ៧.៦ហិកតា នឹងមានតម្លៃប្រមាណជា ៣៥,០០០ដុល្លារអាមេរិក។
គួរបញ្ជាក់ផងដែរថា គម្រោងសាងសង់នេះមានទីតាំងប្រហែល ៧៥០ម៉ែត្រ ពីស្ពានអាកាសក្បាលថ្នល់ តាមបណ្តោយផ្លូវសម្តេចតេជោ ហ៊ុន សែន៕
មតិយោបល់