ក្រសួងសាធារណការ និងដឹកជញ្ជូន បានសំនូមពរដល់ប្រជាពលរដ្ឋទាំងអស់ សូមកុំចាក់ដីខ្ពស់ជាងផ្លូវថ្នល់ ព្រោះវាអាចបង្កបានជាទឹកដក់ ដែលធ្វើឲ្យទឹកជ្រាបចូលស្រទាប់គ្រឹះផ្លូវ ធ្វើឲ្យផ្លូវឆាប់ខូចមុនអាយុកាល។ នេះបើយោងតាមការឲ្យដឹងពីគេហទំព័ររបស់ក្រសួងសាធារណការ និងដឹកជញ្ជូន។

កាលពីថ្ងៃទី ៩​ ខែមករាកន្លងទៅ លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញចុះត្រួតពិនិត្យផ្លូវជាតិលេខ​ ៨, ៧, ៧៣ ដើម្បីពង្រឹងប្រសិទ្ធភាពផ្លូវថ្នល់ជូនប្រជាពលរដ្ឋ។

ក្នុងពេលនោះដែរ លោកក៏បានអំពាវនាវទៅដល់ ប្រជាពលរដ្ឋដែលសាងសង់លំនៅដ្ឋាន ឬសំណង់អគារផ្សេងៗ តាមដងផ្លូវសាធារណៈ សូមមេត្តាកុំចាក់ដីខ្ពស់ជាងផ្លូវថ្នល់ បើទោះបីការស្ថាបនាផ្លូវ ត្រូវបានធ្វើប្រកបដោយគុណភាពល្អយ៉ាងណាក៏ដោយ ក៏អាចឆាប់ខូចដោយសារទឹកជ្រាបដែរ។

គួររម្លឹកដែរថា ដើម្បីចូលរួមជួសជុលផ្លូវថ្នល់ ម៉ូតូរ៉ឺម៉កចំនួន ៦៥គ្រឿង សម្រាប់ជួសជុលសំបុកមាន់ បាន ចាប់ផ្តើមចុះជួសជុលទូទាំងប្រទេសកម្ពុជា ចាប់ពីខែមករា​ ឆ្នាំ​ ២០១៧តទៅហើយ៕