ពលករកម្ពុជា ដែលធ្វើការនៅប្រទេសកូរ៉េ បានផ្ញើប្រាក់ទៅក្រុមគ្រួសារ នៅកម្ពុជា ប្រមាណជាង ៥០០លានដុល្លារអាមេរិក ក្នុងឆ្នាំ ២០១៦កន្លងទៅនេះ។ នេះបើយោងតាមការចេញផ្សាយកាលពីម្សិលមិញនេះ របស់ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ។
លោក ឡុង ឌីម៉ង់ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានចាត់ទុកថា សាធារណរដ្ឋកូរ៉េ គឺជាសាលាដ៏ធំមួយ ដែលបានបណ្តុះបណ្តាលវិជ្ជាជីវ:បច្ចេកទេស ដល់ពលករកម្ពុជាប្រមាណជាង ៥ម៉ឺននាក់ ដែលកម្ពុជា កំពុងត្រូវការពលករជំនាញបែបនេះ។
ដូច្នេះការបញ្ជូនពលករមកបម្រើការងារ គឺមានសារ:សំខាន់ណាស់ សម្រាប់ការអភិវឌ្ឍន៍ប្រទេសទាំងពីរ ជាពិសេសអភិវឌ្ឍន៍ធនធានមនុស្សរបស់កម្ពុជា។
ក្នុងនោះដែរ លោក ឡុង ឌីម៉ង់ និងក្រុមការងារ បានបន្តអប់រំផ្សព្វផ្សាយពីការថែរក្សាសុខភាព សុវត្ថិភាពក្នុងការរស់នៅ និងធ្វើការនៅសាធារណរដ្ឋកូរ៉េ ការផ្តល់សេវាសាធារណ:របស់ស្ថានទូតជាដើម។
គួរបញ្ជាក់ដែរថា បច្ចុប្បន្នមានប្រជាជនកម្ពុជា ប្រមាណ ៦ម៉ឺននាក់ កំពុងរស់នៅសាធារណរដ្ឋកូរ៉េ ខណ:ជាង ៤ម៉ឺននាក់ មានការងារធ្វើ៕
មតិយោបល់