គម្រោងសួនច្បារ និងផ្លូវថ្មើរជើង ប្របតាមមាត់ទន្លេពីចំណុចផ្សាររាត្រីដល់ស្ពានជ្រោយចង្វារ គ្រោងនឹងបញ្ចប់ការសាងសង់ ឲ្យបានមុនថ្ងៃបុណ្យអុំទូកឆ្នាំនេះ ចូលមកដល់។ នេះបើយោងតាមការឲ្យដឹងពី លោក ប៉ា សុជាតិវង្ស អភិបាលក្រុងភ្នំពេញ។

បន្ទាប់ពីផ្លូវថ្មើរជើង ប្របមាត់ទន្លេ តភ្ជាប់ពីមុខព្រះបរមរាជវាំង រហូតដល់ស្ពានភ្លោះកោះពេជ្រ ត្រូវបានសាងសង់រួចរាល់កាលពីពេលថ្មីៗនេះ សាលារាជធានីភ្នំពេញ នឹងចាប់ផ្តើមសាងសង់គម្រោងសួនច្បារចាប់ពីផ្សារចាស់រហូតដល់ស្ពានជ្រោយចង្វារ ហើយគម្រោងបន្ទាប់ អាចនឹងធ្វើឡើងចាប់ពីស្ពានជ្រោយចង្វាររហូតដល់ស្ពានព្រះមុនីវង្ស។

ផ្លូវមាត់ទន្លេ ចាប់ពីមុខព្រះបរមរាជវាំង ដល់វត្តភ្នំ អាចនឹងត្រូវបានបិទចរាចរណ៍ រៀងរាល់ថ្ងៃសៅរ៍-អាទិត្យ ដើម្បីធ្វើជាផ្លូវថ្មើរជើង សម្រាប់ភ្ញៀវទេសចរដើរកម្សាន្ត។ នេះបើយោងតាមការលើកឡើងកាលពីពេលថ្មីៗនេះ របស់លោក ថោង ខុន រដ្ឋមន្រ្តីក្រសួងទេសចរណ៍។

លោក ថោង ខុន បានស្នើដល់សាលារាជធានីភ្នំពេញឲ្យយកទុកដាក់លើ គម្រោងនេះ ហើយប្រព្រឹត្តទៅឲ្យបានឆាប់រហ័ស ដោយគិតគូរពីទីកន្លែងចតឡានផងដែរ ចៀសវាងការកកស្ទះ មានការរៀបចំបន្ទប់ទឹកសាធារណៈ ដាក់ឆ័ត្រសម្រាប់ឲ្យភ្ញៀវជ្រកម្លប់ ជាដើម។

ការសាងសង់សួនច្បារ និងផ្លូវថ្មើរជើងប្របមាត់ទន្លេនេះ គឺសម្រាប់ប្រជាពលរដ្ឋកម្ពុជា ភ្ញៀវជាតិ-អន្តរជាតិ អាចដើរកម្សាន្តតាមបណ្តោយមាត់ទន្លេ ស្រូបយកខ្យល់អាកាសបរិសុទ្ធ ជាពិសេសគឺ កាត់បន្ថយការកកស្ទះចរាចរណ៍ នៅពេលមានមនុស្សច្រើនចូលរួមពិធីបុណ្យធំៗ។

គួរបញ្ជាក់ដែរថា ដោយមើលឃើញពីសក្តានុពលនៃផ្សាររាត្រីភ្នំពេញ សាលារាជធានីភ្នំពេញ គ្រោងនឹងកែលម្អសោភ័ណភាពនៃផ្សាររាត្រីនេះ ឲ្យក្លាយទៅជាតំបន់ផ្សារទេសចរណ៍ ដើម្បីទាក់ទាញភ្ញៀវជាតិ-អន្តរជាតិផងដែរ៕