Post News Media ព័ត៌មានសេដ្ឋកិច្ច ស្ពានអាកាសផ្ស...

ស្ពានអាកាសផ្សារដីហុយ ស្ថាបនាសម្រេចជិត ៥០ភាគរយ គ្រោងបញ្ចប់ក្នុងខែធ្នូ ឆ្នាំ២០១៧

ស្ពានអាកាសផ្សារដីហុយ ស្ថាបនាសម្រេចបានប្រមាណជា ៤៥ភាគរយហើយ គិតមកទល់ពេលនេះ បន្ទាប់ពីបានបើកការដ្ឋានសាងសង់ កាលពីចុងខែសីហាកន្លងមក។ នេះបើយោងតាមគេហទំព័ររបស់មន្ទីរសាធារណការ និងដឹកជញ្ជូន ចេញផ្សាយនៅព្រឹកនេះ។

ការអនុវត្តការងារនៅក្នុងការដ្ឋានទាំងមូល សម្រេចបានប្រមាណ ៤៥ភាគរយ ដោយអ្នកជំនាញកំពុងតែចាក់តម្លើងសសរស្ពាន ចាក់ជើងតាង និងចាក់ពុម្ព សសរបេតុងស្ពាន។

គម្រោងសាងសង់ស្ពានអាកាសនេះ មានប្រវែង ៩០៥ម៉ែត្រ ទទឹង ១៦.៦ម៉ែត្រ ហើយគ្រោងនឹងបញ្ចប់ការសាងសង់ទាំងស្រុង នៅខែធ្នូ ឆ្នាំ ២០១៧ខាងមុខនេះ។

ស្ពានអាកាសស្តុបផ្សារដីហុយ ស្ថិតនៅប្រសព្វរវាងមហាវិថីសហព័ន្ធរុស្ស៊ី និងផ្លូវហាណូយ ជាគម្រោងហិរញ្ញប្បទានរបស់ប្រទេសចិន និងទទួលបានសិទ្ធិសាងសង់ដោយក្រុមហ៊ុនសៀងហៃ ហើយត្រួតពិនិត្យបច្ចេកទេសដោយ ក្រសួងសាធារណការ និងដឹកជញ្ជូន។

គួរបញ្ជាក់ដែរថា បច្ចុប្បន្ន រាជធានីភ្នំពេញមានស្ពានអាកាសចំនួន ៤ គឺស្ពានអាកាសតិចណូ ស្ពានអាកាសក្បាលថ្នល់ ស្ពានអាកាសពេទ្យលោកសង្ឃ និងស្ពានអាកាសស្ទឹងមានជ័យ ហើយស្ពានអាកាសចោមចៅ គ្រោងនឹងសាងសង់ក្នុងពេលឆាប់ៗខាងមុខ៕