កាលពីពេលថ្មីៗនេះ លោក ភឿង សុភ័ណ្ឌ រដ្ឋលេខាធិការនៃ ក្រសួងរៀបចំដែនដី នគរូបនីយកម្ម និងសំណង់បានពន្យល់ឲ្យដឹងថា បើ​ចង់ឲ្យវិស័យសំណង់នៅកម្ពុជា ពោរពេញទៅដោយអត្តសញ្ញាណខ្មែរ គឺត្រូវបំផុសចេញពីឈាមជ័រ និងបេះដូងរបស់កូនខ្មែរគ្រប់រូប។

ការជ្រើសរើសរចនាបថក្នុងការសាងសង់ គឺជាសិទ្ធិរបស់វិនិយោគិន ហើយអ្វីដែលកម្ពុជាអាចធ្វើបានគឺត្រូវបំផុសឈាមជ័រ ឲ្យកូនខ្មែរធ្វើចេញពីបេះដូង ព្យាយាមពន្យល់បង្ហាញដល់វិនិយោគិន ពីភាពអស្ចារ្យនៃរចនាបថខ្មែរ និងបញ្ចុះបញ្ចូលឲ្យទទួលយក។

សំណង់អគារនីមួយៗ មិនអាចមានអត្តសញ្ញាណខ្មែរ ១០០ភាគរយ ព្រោះកម្ពុជា មិនអាចបង្ខំឲ្យម្ចាស់គម្រោងធ្វើបាននោះទេ ហើយពេលខ្លះ ស្ថាបត្យករខ្មែរ ក៏គ្មានមនសិការ ក្នុងការបញ្ចូលស្ថាបត្យកម្មខ្មែរ ទៅក្នុងគម្រោងនេះដែរ។

លោក បន្តថា រដ្ឋាភិបាលកម្ពុជា តែងតែប្រឹងប្រែងជម្រុញវិស័យសំណង់ ឲ្យកាន់តែប្រសើរឡើង ដោយប្រើប្រាស់អត្តសញ្ញាណខ្មែរឲ្យបានកាន់តែច្រើន ពោលគឺ ក្រសួងតែងតែណែនាំ វិនិយោគិនឲ្យប្រើប្រាស់អត្តសញ្ញាណខ្មែរ​នៅក្នុងវិស័យសំណង់។

លើសពីនេះទៅទៀត ក្រសួងវិចិត្រសិល្ប: និងក្រសួងអប់រំ ក៏ត្រូវសហការជាមួយសាកលវិទ្យាល័យនានា ត្រូវកសាងធនធានមនុស្សពីដំបូង បំប៉នចំណេះដឹង ចំណេះធ្វើ ត្រូវបំផុសពីក្នុងបេះដូង បំផុសឈាមជ័រកូនខ្មែរ ឲ្យមានឧត្តមគតិស្នេហាជាតិ ចេះរក្សាបាននូវ អត្តសញ្ញាណជាតិខ្មែរ។

ជាចុងក្រោយ លោក ភឿង សុភ័ណ្ឌ បានឲ្យដឹងថា មានកត្តា ៥យ៉ាងសំខាន់ ដែលជម្រុញឲ្យវិស័យសំណង់កាន់តែរីកចម្រើន រួមមាន សមត្ថភាព បច្ចេកទេសនិងបច្ចេកវិទ្យា សម្ភារ:សាងសង់ ថវិកា និងឆន្ទ:នយោបាយ៕

រូបភាព៖Cambodia Architect & Decor