ព័ត៌មានសេដ្ឋកិច្ច

កម្ពុជា ផ្តល់ Visa ចេញចូលច្រើនដង មានរយៈពេល ៣ឆ្នាំ ដល់វិនិយោគិនចិន និងកូរ៉េ

កម្ពុជា នឹងផ្តល់នូវទិដ្ឋាការ (Visa) ចេញចូលច្រើនដង និងមានរយ:ពេល ៣ឆ្នាំ ដល់វិនិយោគិនមកពីប្រទេសចិន និងប្រទេសកូរ៉េ សម្រាប់អ្នកកាន់លិខិតឆ្លងដែនធម្មតា។ នេះបើយោងតាមការលើកឡើង កាលពីម្សិលមិញនេះរបស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។

ថ្លែងក្នុងពិធីបើកវេទិកាធុរកិច្ច និងហិរញ្ញវត្ថុកម្ពុជា-ចិន សម្តេចបន្តថា មិត្តចិន ជាអ្នកដែលបានជួយកសាងផ្លូវវែងជាងគេនៅកម្ពុជា មានប្រវែងសរុប ១៥០០គីឡូម៉ែត្រ និងស្ពានដែលបានសាងសង់រួចចំនួន ៧ មានប្រវែងសរុបប្រមាណ ៣១០៤ម៉ែត្រ។

លើសពីនេះទៅទៀត ការផ្គត់ផ្គង់ថាមពលអគ្គិសនី មានការកើនឡើងពី ១៨០មេហ្គាវ៉ាត់នៅឆ្នាំ ២០០២ ដល់ ១៩៨៦មេហ្គាវ៉ាត់នៅឆ្នាំ ២០១៥។

ជាក់ស្តែងពាណិជ្ជកម្មសរុបរវាងកម្ពុជា និងចិន ឆ្នាំ ២០១៥ សម្រេចបានចំនួន ៤៣០០លានដុល្លារអាមេរិក ដែលកើនឡើងប្រមាណ ១៥ភាគរយធៀបនឹងឆ្នាំ ២០១៤ ហើយក្នុងឆ្នាំ ២០១៧ខាងមុខនេះ ថ្នាក់ដឹកនាំនៃប្រទេសទាំងពីរ បានដាក់ផែនការបង្កើតទំហំពាណិជ្ជកម្មសរុបរវាងប្រទេសទាំងពីរ ឲ្យសម្រេចបានជាទឹកប្រាក់ចំនួន ៥ពាន់លានដុល្លារអាមេរិក៕

chinese-korea-invest

មតិយោបល់