កាលពីពេលថ្មីៗនេះ លោក អ៊ិត សំហេង រដ្ឋមន្រ្តីក្រសួងការងារនិងបណ្តុះបណ្តាលវិជ្ជាជីវ: បានជួបពិភាក្សាការងារជាមួយ លោក Zhou Yaoting អភិបាលនៃក្រុមហ៊ុន Hodo ហើយបានអំពាវនាវឲ្យ ក្រុមហ៊ុន Hodo ពិនិត្យមើលលទ្ធភាពវិនិយោគលើ ការផលិតសំបកកង់រថយន្ត នៅកម្ពុជា ដើម្បីឆ្លើយតបទៅនឹងតម្រូវការចាំបាច់នូវ កំណើនយានយន្តដ៏ច្រើននៅក្នុងប្រទេសកម្ពុជា។

ជាការឆ្លើយតប ក្រុមហ៊ុន Hodo ប្តេជ្ញាចិត្តខ្ពស់ក្នុងការវិនិយោគនៅកម្ពុជា ដោយចាត់ទុកជាប្រទេសដំបូងគេ ដែលមានលក្ខណ:អំណោយផលបំផុត ក្នុងការធ្វើការវិនិយោគ ដោយសារកម្ពុជា មានធនធានគ្រប់គ្រាន់ មានលក្ខខណ្ឌល្អ និងមានចំណងកិច្ចសហប្រតិបត្តិការល្អរវាង កម្ពុជា-ចិន។

ក្រុមហ៊ុន Hodo Group របស់ប្រទេសចិន ក៏ធ្លាប់បានបង្ហាញពីគម្រោងវិនិយោគលើដំណាំកៅស៊ូនៅកម្ពុជា យកទៅផលិតជាសំបកកង់។ នេះបើយោងតាមទីភ្នាក់ងារសារព័ត៌មានជាតិ។

ក្រុមហ៊ុន បានមើលឃើញពីសក្តានុពលនៃដំណាំកៅស៊ូនៅកម្ពុជា ហើយបច្ចុប្បន្នកំពុងតែសិក្សាពីគម្រោងវិនិយោគទៅលើដំណាំដ៏មានសក្តានុពលមួយនេះ ប៉ុន្តែមិនទាន់អាចបង្ហាញពីទីតាំង និងទំហំប្រាក់បោះទុនវិនិយោគបាននៅឡើយទេ។

យ៉ាងណាមិញ ក្រុមហ៊ុន Hodo Group ក៏ជាដៃគូវិនិយោគនៅតំបន់សេដ្ឋកិច្ចពិសេសព្រះសីហនុ ដែលជាតំបន់សេដ្ឋកិច្ចពិសេសធំជាងគេនៅកម្ពុជា កំពុងផ្តល់ការងារដល់ប្រជាជនជាង ២០,០០០នាក់ នឹងក្រុមហ៊ុនចំនួនជាង ១០០ កំពុងដំណើរការ។

គួរបញ្ជាក់ដែរថា ក្រុមហ៊ុន Hodo គឺជាក្រុមហ៊ុនដ៏ធំប្រចាំប្រទេសចិន ដែលមានប្រមាណ ៥០០សាខាទូទាំងប្រទេសចិន ហើយប្រកបអាជីវកម្មលើ ការកាត់ដេរសម្លៀកបំពាក់ អចលនវត្ថុ ការផលិតសំបកកង់ ការផលិតឱសថ និងការបង្កើតតំបន់សេដ្ឋកិច្ចពិសេស៕