ក្រសួងទេសចរណ៍ និងក្រសួងបរិស្ថាន បានឯកភាពគ្នាបង្កើតក្រុមការងារអន្តរក្រសួង ដើម្បីជម្រុញការងារអេកូទេសចរណ៍ ដែលក្នុងនោះមានការអភិវឌ្ឍន៍ អេកូឡូជ (Eco Lodge) សណ្ឋាគារកុងតឺន័រក្នុងព្រៃ ផ្ទះលើចុងដើមឈើ។ នេះបើយោងតាមការឲ្យដឹងពី គេហទំព័ររបស់ក្រសួងទេសចរណ៍ ចេញផ្សាយកាលពីម្សិលមិញនេះ។

ការអភិវឌ្ឍនេះ គឺស្របជាមួយគំនិតច្នៃប្រឌិត និងបច្ចេកវិទ្យាចុងក្រោយ ដោយរក្សា និងមិនបង្កឲ្យមានផលប៉ះពាល់ដល់ ធនធានធម្មជាតិនៅក្នុងព្រៃ និងតំបន់អភិរក្សធម្មជាតិ ហើយផ្នែកឯកជន ត្រូវចូលរួមជាវិភាគទាន ដើម្បីទ្រទ្រង់ដល់បរិស្ថាន។

លោក ថោង ខុន រដ្ឋមន្រ្តីក្រសួងទេសចរណ៍ បានកំណត់ទិសដៅអភិវឌ្ឍតំបន់អេកូទេសចរណ៍ធំ ៣ គឺ តំបន់ចុងឃ្នៀស (បឹងទន្លេសាប) តំបន់ព្រែកទាល់ និងតំបន់ភ្នំគូលែន ដើម្បីបង្កើតជាជម្រើសផលិតផលអេកូទេសចរណ៍ ដែលមានកំណើនប្រមាណ ១០ភាគរយ ជារៀងរាល់ឆ្នាំ។

គួរជម្រាបដែរថា ការអភិវឌ្ឍន៍គម្រោងនេះ គឺទាមទារឲ្យមានការចូលរួមពី ផ្នែកឯកជន និងប្រជាពលរដ្ឋមូលដ្ឋាន ដើម្បីជួយទ្រទ្រង់ដល់បរិស្ថាន ព្រោះថាការអភិរក្សធនធានធម្មជាតិ ត្រូវចំណាយថរិកាច្រើន៕