កាលពីពេលថ្មីៗនេះ រោងចក្រផលិតចំណីសត្វ ម៉ុង ឫទ្ធី គ្រោងនឹងជម្រុញការផលិតចំណីបន្ថែមទៀត ដើម្បីឲ្យបានផលិតផលសម្រេចកាន់តែច្រើន នឹងអាចបង្កើនការទិញកសិផលដូចជា ពោត ដំឡូងមី ពីកសិករឲ្យបានចាប់ពី ១៦០ ទៅ ២០០តោនក្នុងមួយថ្ងៃដូចគ្នា។

យោងតាមគេហទំព័រហ្វេសប៊ុករបស់ លោកឧកញ៉ា ម៉ុង ឫទ្ធី បានឲ្យដឹងថា ការជម្រុញផលិតបន្ថែមម៉ោងនេះ គឺដើម្បីជួយសម្រាលដល់ទុកលំបាករបស់ប្រជាកសិករ ក្នុងការស្វែងរកទីផ្សារលក់កសិផលរបស់ពួកគាត់។

គួររម្លឹកដែរថា កាលពី ៣ខែដើមឆ្នាំ ២០១៧ រោងចក្រផលិតចំណីសត្វរបស់ លោកឧកញ៉ា ម៉ុង ឫទ្ធី គឺដំណើរការបានល្អ អាចផលិតបាន ២០តោន ក្នុងមួយម៉ោង។ នេះបើយោងតាមទីភ្នាក់ងារសារព័ត៌មានជាតិ។

ក្នុងរយ:ពេល ៣ខែ ដើមឆ្នាំ ២០១៧នេះ រោងចក្រផលិតបាន ២០តោនក្នុង ១ម៉ោង ពោលគឺផលិតបានចន្លោះពី ៧,០០០ ទៅ ១០,០០០តោន ក្នុង១ខែ ហើយអាចឈានដល់ ១០ម៉ឺនតោន ក្នុង១ឆ្នាំ។

លោកឧកញ៉ា ម៉ុង ឫទ្ធី ធ្លាប់បានលើកឡើងថា លោកមានមោទនភាព ដែលកសិករកម្ពុជា បានដឹកកសិផលមកលក់ឲ្យរោងចក្រ ប្រមាណជិត ១០០តោនជារៀងរាល់ថ្ងៃ ដែលធ្វើឲ្យសង្វាក់ផលិតកម្មកាន់តែប្រសើរឡើង។

រោងចក្រផលិតចំណីសត្វ ម៉ុង ឬទ្ធី ដែលចំណាយដើមទុនប្រមាណ ១០លានដុល្លារអាមេរិក មានឈ្មោះថា ក្រុមហ៊ុន M’s Pig ACMC ដែលមានសមត្ថភាពផលិតចំណីសត្វប្រមាណ ១០ម៉ឺនតោនក្នុងមួយឆ្នាំ នឹងមានទីតាំងនៅឃុំជើងគោ ស្រុកព្រៃនប់ ខេត្តព្រះសីហនុ។

រោងចក្រដ៏ថ្មីនេះ ជាក្រុមហ៊ុនបុត្រសម្ព័ន្ធ របស់ក្រុមហ៊ុន ម៉ុង ឬទ្ធីគ្រុប អាចផ្តល់ការងារជាច្រើនដល់ប្រជាពលរដ្ឋខ្មែរ ជាពិសេសប្រជាកសិករ អាចលក់ផលិតផលកសិកម្មរបស់ពួកគេ សម្រាប់ធ្វើជាវត្ថុធាតុដើម ផលិតចំណីសត្វ៕