ព័ត៌មានសេដ្ឋកិច្ច

ស្ថានីយ៍ថាមពលសូឡាធំជាងគេបង្អស់នៅកម្ពុជា តម្លៃជាង១២លានដុល្លារ សាងសង់បាន៩៣%

ស្ថានីយ៍ថាមពលដើរដោយពន្លឺព្រះអាទិត្យទំហំ ១០មេហ្គាវ៉ាត់ ដែលគ្រោងនឹងចំណាយទុនប្រមាណ ១២លានដុល្លារអាមេរិក សម្រេចការសាងសង់បាន ៩៣ភាគរយហើយ។ នេះបើយោងតាមការឲ្យដឹងពី គេហទំព័ររបស់ក្រសួងរ៉ែ និងថាមពល។

ស្ថានីយ៍មួយនេះ ធ្វើឡើងនៅលើផ្ទៃដីជាង ១០ហិកតា នៅក្រុងបាវិត ជាស្ថានីយ៍ថាមពលព្រះអាទិត្យដំបូងគេបង្អស់នៅកម្ពុជា ដែលនឹងត្រូវដាក់ឲ្យដំណើរការនៅពាក់កណ្តាលខែសីហានេះ នឹងរំពឹងថា អាចមានលទ្ធភាពភ្ជាប់ជាមួយបណ្តាញជាតិនាពេលខាងមុខ។

យ៉ាងណាមិញ ថាមពលសូឡាផលិតបាន គឺប្រមាណ ១០មេហ្កាវ៉ាត់ ខណ:តម្រូវការប្រើប្រាស់ក្នុងខេត្តស្វាយរៀងមានរហូតដល់ ៤០មេហ្កាវ៉ាត់ ពោលគឺ ផ្គត់ផ្គង់បានប្រមាណ ១ភាគ៤ នៃតម្រូវការ។

ទោះបីជា ការផ្គត់ផ្គង់ថាមពលសូឡា នៅមានកម្រិតទាបនៅឡើយ តែវាជាថាមពលកកើតឡើងវិញ ដែលជាថាមពលស្អាត នឹងជាកត្តាជម្រុញឲ្យមានការវិនិយោគបន្ថែមទៀត លើប្រភេទថាមពលនេះផងដែរ។

គួរជម្រាបដែរថា ក្រុមហ៊ុន Sunseap កំពុងវិនិយោគលើគម្រោងថាមពលសូឡា តម្លៃជាង ១២.៥លានដុល្លារអាមេរិក បន្ទាប់ពីចុះកិច្ចព្រមព្រៀងទិញលក់ថាមពលអគ្គិសនីជាមួយ អគ្គិសនីកម្ពុជា (EDC) សម្រាប់រយ:ពេល ២០ឆ្នាំ ហើយធនាគារអភិវឌ្ឍន៍អាស៊ី (ADB) បានសម្រេចផ្តល់កម្ចី ៩.២លានដុល្លារអាមេរិក ដល់ក្រុមហ៊ុន Sunseap Group ដែលផ្គត់ផ្គង់ថាមពលសូឡា ធំជាងគេ នៅកម្ពុជា៕

មតិយោបល់