កាលពីម្សិលមិញនេះ តំណាងស្ថានទូតសហរដ្ឋអាមេរិកប្រចាំកម្ពុជា លោក David Ryan Sequeira មន្ត្រីទទួលបន្ទុកសេដ្ឋកិច្ចប្រចាំស្ថានទូតសហរដ្ឋអាមេរិក បានចូលជួបសម្ដែងការគួរសម និងពិភាក្សាការងារជាមួយឯកឧត្តម យន្ត មីន អភិបាលខេត្តព្រះសីហនុ ។
លោក David Ryan Sequeira មានប្រសាសន៍ថា ជំនួបពិភាក្សានាពេលនេះ មានគោលបំណងឈ្វេងយល់ពីសក្តានុពលសេដ្ឋកិច្ច និងការវិនិយោគនៅខេត្តព្រះសីហនុ ដើម្បីយកទៅផ្សព្វផ្សាយឱ្យបានជាក់លាក់ដល់អ្នកវិនិយោគសហរដ្ឋអាមេរិក ដែលមានបំណងមកធ្វើការវិនិយោគនៅខេត្តព្រះសីហនុនាពេលខាងមុខ។
ដោយមើលឃើញថា ខេត្តព្រះសីហនុ មានការអភិវឌ្ឍរីកចម្រើនលឿន និងមានអំណោយផលល្អ ក្នុងការដឹកជញ្ជូនតាមផ្លូវទឹកកំពង់ផែសមុទ្រទឹកជ្រៅ និងមានព្រលានយន្តហោះអន្តរជាតិ តភ្ជាប់ទៅកាន់ប្រទេសនៅលើសកលលោក។
ឯកឧត្តម យន្ត មីន បានស្វាគមន៍ចំពោះអ្នកវិនិយោគិននៅខេត្តព្រះសីហនុ ក្នុងនោះមានក្រុមហ៊ុនអាមេរិកចំនួន ៤ បានមកធ្វើការវិនិយោគនៅខេត្តព្រះសីហនុ។
ខេត្តព្រះសីហនុ មានកោះរ៉ុង និងប្រជុំកោះជាច្រើនទៀត និងមានផ្កាថ្មស្អាត អាស្រ័យដោយខេត្តមានធនធានធម្មជាតិ ក្លាយជាគោលដៅវិនិយោគ និងទេសចរយ៉ាងសំខាន់ មានកំពង់ផែទឹកជ្រៅ ដែលមានកុងតឺន័រឆ្លងកាត់ប្រមាណ ៧២ភាគរយ ខេត្តព្រះសីហនុមានសន្តិសុខ សុវត្ថិភាពល្អ សម្រាប់អ្នកវិនិយោគ និងទេសចរ ។
ឯកឧត្តម យន្ត មីន បានបញ្ជាក់ថា រាជរដ្ឋាភិបាលកម្ពុជាបានចាត់ទុកខេត្តព្រះសីហនុ ជាតំបន់ប៉ូលសេដ្ឋកិច្ចពហុបំណងធំជាងគេក្នុងប្រទេសកម្ពុជា ក្នុងនោះមានវិស័យឧស្សាហកម្ម ពាណិជ្ជកម្ម និងទេសចរណ៍ ព្រមទាំងស្នើឱ្យសហរដ្ឋអាមេរិកនាំអ្នកវិនិយោគមកកាន់ខេត្តព្រះសីហនុ លើសេវាកម្មទេសចរណ៍ និងឧស្សាហកម្ម ខណ:ខេត្តព្រះសីហនុកំពុងខ្វះខាតនូវសណ្ឋាគារ ផ្ទះសំណាក់នៅពេលមានពិធីបុណ្យជាតិ អន្តរជាតិ ហើយកម្ពុជាមានការអនុគ្រោះសម្រាប់អ្នកវិនិយោគជាតិ និងអន្តរជាតិផងដែរ ៕
មតិយោបល់