កាលពីពេលថ្មីៗនេះ សភាយុវពាណិជ្ជករអន្តរជាតិកម្ពុជា សាខាភ្នំពេញ និងសណ្ឋាគារ សុខា ភ្នំពេញ រួមគ្នាចុះហត្ថលេខាលើអនុស្សារណៈយោគយល់គ្នា ជាមួយ អង្គការមន្ទីរពេទ្យកុមារអង្គរ ខេត្តសៀមរាប ស្តីពីគម្រោង «ចែករំលែកស្នាមញញឹម» នៅសណ្ឋាគារ សុខា ភ្នំពេញ។

គម្រោង ចែករំលែកស្នាមញញឹម​នេះ គឺជាគម្រោងមួយបង្កើតដោយ លោក ឈាង សុភ័ក្រ ប្រធានសភាយុវពាណិជ្ជករអន្តរជាតិកម្ពុជា ក្នុងឆ្នាំ ២០១១ ដែលមានសកម្មភាពផ្តោតលើការជួយកុមារកំព្រា កុមារក្រីក្រ ឬពិការ ដើម្បីឲ្យពួកគេ​មានឱកាសក្នុងការទទួលនូវការថែទាំសុខភាព និងបន្តការសិក្សារៀនសូត្រ ឲ្យបានល្អប្រសើរសម្រាប់ជីវិតពួកគេ។​

ផ្សារភ្ជាប់នឹង ទស្សនៈវិស័យ និងបេសកកម្មរបស់មន្ទីរពេទ្យកុមារអង្គរ ខេត្តសៀមរាប គឺធ្វើយ៉ាងណាឲ្យកុមារកម្ពុជាមានឱកាសទទួលបាននូវ​ការថែទាំសុខភាពប្រកបដោយគុណភាពខ្ពស់ និងសេចក្តីមេតា្តករុណា ទោះជាពួកគេមកពីមជ្ឈដ្ឋានណាក៏ដោយ សភាយុវពាណិជ្ជករអន្តរជាតិកម្ពុជា សាខាភ្នំពេញ និងសណ្ឋាគារ សុខា ភ្នំពេញ​បានព្រមព្រៀងសហការគ្នា រៀបចំកម្មវិធីមួយ ហៅថា «រាត្រីសមោសរក្រមា ឆ្នាំ២០១៨ (Krama Night Gala Dinner 2018)» ក្នុងគោលបំណង ផ្សព្វផ្សាយអំពីគម្រោងចែករំលែកស្នាមញញឹមកុមារកម្ពុជា និងរៃអង្គាសថវិកា ឧបត្ថម្ភដល់មន្ទីរពេទ្យកុមារអង្គរ​ ខេត្តសៀមរាប ដែលកំពុងតែជួបប្រទះនឹង ការខ្វះខាតថវិកាដើម្បីផ្គត់ផ្គង់ដល់ដំណើរការផ្តល់សេវាពិនិត្យព្យាបាល ថែទាំសុខភាពកុមារកម្ពុជារាប់សែននាក់ និងសកម្មភាពបណ្តុះបណ្តាលវេជ្ជសាស្ត្រដល់មន្ត្រីសុខាភិបាលរាប់រយនាក់ រួមទាំងសកម្មភាពការពារសុខភាពបឋមដល់ ប្រជាពលរដ្ឋរាប់ពាន់នាក់នៅតាមសហគមន៍ខេត្តសៀមរាប ក្នុងមួយឆ្នាំៗ។

កម្មវិធីនេះ នឹងប្រព្រឹត្តិទៅនៅ ថ្ងៃអាទិត្យ ទី ៣០ ខែមីនា ឆ្នាំ ២០១៨​ ចាប់ពីម៉ោង ៦ល្ងាច ដល់ ម៉ោង ១០ យប់ នៅសណ្ឋាគារ សុខា ភ្នំពេញ រាជធានីភ្នំពេញ ដោយរំពឹងថានឹងមានអ្នកចូលរួម ប្រមាណជិត ៣០០នាក់ មកពីស្ថាប័នក្រសួងមួយចំនួននៃរាជរដ្ឋាភិបាល សមាគមមួយចំនួនដូចជា សមាគមសហគ្រិនវ័យក្មេង សមាគមសហគ្រិនស្ត្រីកម្ពុជា តំណាង ក្រុមហ៊ុននានា អ្នកឧបត្ថម្ភកម្មវិធី សប្បុរសជននានាក្នុងទីក្រុងភ្នំពេញ រួមទាំងភ្ញៀវ​កិត្តិយសជាតិ និងអន្តរជាតិជាច្រើននាក់ទៀត។

កម្មវិធីនេះ នឹងចាប់ផ្តើមដោយមានការតាំងពិព័រណផលិតផល ឬសេវាកម្មរបស់អ្នកឧបត្ថម្ភធំៗ និងបន្តបន្ទាប់ដោយកិច្ចទទួលស្វាគមន៍ជាភេសជ្ជៈរបស់សណ្ឋាគារ សុខា ភ្នំពេញ បទបង្ហាញអំពីសកម្មភាពរបស់មន្ទីរពេទ្យកុមារអង្គរ និង សភាយុវពាណិជ្ជករអន្តរជាតិកម្ពុជា អមជាមួយនឹងការសំណេះសំណាលរបស់អ្នករៀបចំកម្មវិធី អ្នកឧបត្ថម្ភធំៗ ព្រមទាំង ការទទួលទានភោជនីយហារ ការរាំលេងកំសាន្ដ ការដេញថ្លៃនូវវត្ថុអនុស្សាវរីយ៍មួយចំនួនដូចជាផ្ទាំងរូបថតប្រាង្គប្រាសាទអង្គរ​ ជាស្នាដៃដ៏ល្អប្រណិតរបស់ស្ថាបនិក នៃមន្ទីរពេទ្យកុមារអង្គរ និងរូបគំនូរដែលជាស្នាដៃរបស់សិល្បករល្បីៗមួយចំនួន ក្នុងប្រទេសកម្ពុជាយើងផងដែរ។

សម្រាប់ព័ត៌មានទំនាក់ទំនងបន្ថែម មានភ្ជាប់ជូនដូចខាងក្រោម៖