ព័ត៌មានសេដ្ឋកិច្ច

រោងចក្រផលិតចំណីសត្វទំនើបជាងគេនៅកម្ពុជា បោះទុន ៦លានដុល្លារ ផលិតបាន ៥០០តោនក្នុងមួយថ្ងៃ

ភ្នំពេញ: រោងចក្រផលិតចំណីសត្វអគារទី ២ របស់ក្រុមហ៊ុន ស៊ីឈួន ញ៉ូវហូក បានបោះទុនបន្ថែម ៦លានដុល្លារអាមេរិក នឹងត្រូវបានដាក់សម្ភោធ ឲ្យដំណើរការជាផ្លូវការ នៅក្នុងតំបន់សេដ្ឋកិច្ចពិសេសភ្នំពេញ កាលពីថ្ងៃទី ១៩ ខែកញ្ញា ម្សិលមិញនេះ ដោយមានការចូលរួមពីលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ។

រោងចក្រផលិតចំណីសត្វទី ២នេះ គឺជារោងចក្រដែលផលិតចំណីសត្វបែបទំនើបជាងគេបង្អស់ និងប្រើម៉ាស៊ីនស្វ័យប្រវត្តិ ដែលមានបច្ចេកវិទ្យាខ្ពស់បំផុត នៅក្នុងប្រទេសកម្ពុជា ហើយរោងចក្រនេះ មានលទ្ធភាពផលិតចំណីសត្វគ្រប់ប្រភេទបាន ១៨ម៉ឺនតោនក្នុងមួយឆ្នាំ គឺស្មើនឹង ៥០០តោន ក្នុងមួយថ្ងៃ។ នេះបើយោងតាមការលើកឡើងរបស់លោក Du Chang Ping អគ្គនាយកក្រុមហ៊ុន ញ៉ូវហូក។

លើសពីនេះទៅទៀត ក្រុមហ៊ុនបានរួមចំណែកក្នុងការប្រមូលទិញវត្ថុធាតុដើម ផលិតផលកសិកម្មក្នុងស្រុកចំនួន ២៥ពាន់តោនក្នុងមួយឆ្នាំ សម្រាប់បម្រើឲ្យការផលិតចំណីសត្វដូចជា ពោត ដំឡូងមី កន្ទក់ ចុងអង្ករ កាល់ស្យូមជាដើម។

លោក វេង សាខុន ក៏បានបន្ថែមផងដែរថា ការបង្កើតរោងចក្រនេះ ក៏ឆ្លើយតបនឹងតម្រូវការរបស់ប្រជាពលរដ្ឋកម្ពុជា ក្នុងការចិញ្ចឹមសត្វផងដែរ ហើយឆ្លើយតបតាមគោលនយោបាយកសិកម្មរបស់រាជរដ្ឋាភិបាល របស់ក្រសួងកសិកម្មឆ្នាំ ២០១៤-២០១៨ ដែលកំពុងអនុវត្តន៍នាពេលបច្ចុប្បន្ន។

គួរបញ្ជាក់ថា ចំណីសត្វប្រមាណ ៨៥ភាគរយ ក្រុមហ៊ុនលក់ទៅឲ្យតាមដេប៉ូចំណីសត្វនៅទូទាំងប្រទេស និង ១៥ភាគរយ លក់ដល់កសិករផ្ទាល់តែម្តង៕

14344964_1221226457915556_7962644339882314354_n 14317431_1221226051248930_4199112151013852120_n

មតិយោបល់