ភ្នំពេញ: រសៀលថ្ងៃទី១៩ ខែកញ្ញា ឆ្នាំ២០១៦ នៅទីលានមាត់ទន្លេផ្សារតូច ស្នងការសម្ភារ:បច្ចេកទេស បានធ្វើពិធីបិទវគ្គបំប៉នដៃចង្កូតអូប័រជំនាន់ទី១៦ និងហ្វឹកហ្វឺនវិធីសាស្ត្រជំនាញក្នុងការជួយសង្គ្រោះ ដល់ប្រជាពលរដ្ឋ ដែលទទួលរងគ្រោះដោយសារទឹកជំនន់ ក្រោមអធិបតីភាពលោក ឧត្តមសេនីយ៍ឯក ទៀវ ប៊ុនខេង មេបញ្ជាការរងទទួលបន្ទុកស្នងការសម្ភារ:បច្ចេកទេស តំណាងដ៏ខ្ពង់ខ្ពស់លោក នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស។
ក្នុងពិធីនោះដែរ ក៏មានការចូលរួមពី លោកឧត្តមសេនីយ៍ស្នងការរង លោកនាយ នាយរងការិយាល័យ និងពលអាវុធហត្ថជាច្រើនរូបផងដែរ។ លោកវរសេនីយ៍ឯក ផាត់ សាវុធ គ្រូបង្ហាត់ និងជានាយរងស្នងការសម្ភារ:បច្ចេកទេស បានឲ្យដឹងថា វគ្គបំប៉នដៃចង្កូតអូប័រ និងវិធីសាស្ត្រជួយសង្គ្រោះនេះមានសិក្ខាកាមចំនួន៦០នាក់ មកពីបណ្តាអង្គភាពចំណុះបញ្ជាការដ្ឋាន កងរាជអាវុធហត្ថលើផ្ទៃប្រទេស។ មេរៀនដែលត្រូវសិក្សាមានទ្រឹស្តីអំពីលក្ខណ:បច្ចេកទេសម៉ាស៊ីនអូប័រ របៀបចាប់ម៉ាស៊ីនអូប័រ, ភ្ជាប់តួបញ្ឆេះម៉ាស៊ីន, របៀបបើកបរលើផ្ទៃទឹក, របៀបបើកបរសង្គ្រោះ និងរបៀបបើកបរសមយុទ្ធពិធីផ្សេងៗ។
ក្នុងការអនុវត្តន៍ជាក់ស្តែងមានអូប័រសម្រាប់ហ្វឹកហ្វឺនចំនួន០៨គ្រឿង,រថយន្តដឹកជញ្ជូន០៥គ្រឿង ដែលហ្វឹកហាត់មានរយ:ពេល៧ថ្ងៃ។ សិក្ខាកាមបានប្រឡងដៃចង្កូតអូប័រជាប់ជាស្ថាពរមានចំនួន៦០នាក់ស្មើនឹង៩៥ភាគរយ ក្នុងនោះទទួលបាននិទ្ទេសល្អចំនួន៣៩នាក់, និទ្ទេសល្អបង្គួរចំនួន១៣នាក់ និងមធ្យម០៨នាក់។
នៅក្នុងឱកាសបិទវគ្គហ្វឹកហាត់នោះដែរលោក ឧត្តមសេនីយ៍ឯក ទៀវ ប៊ុនខេង បានមានប្រសាសន៍ផ្តាំផ្ញើ និងវាយតម្លៃខ្ពស់ចំពោះលទ្ធផលវគ្គហ្វឹកហាត់នេះប្រកបដោយការខិតខំប្រឹងប្រែងយកចិត្តទុកដាក់ក្នុងការហ្វឹកហ្វឺនរហូតបានទទួលលទ្ធផលល្អប្រសើរបែបនេះ ៕
មតិយោបល់