ផ្លូវរថភ្លើងតភ្ជាប់កម្ពុជា-ថៃ ដែលបានផ្អាកដំណើរការអស់ជាង ៣០ឆ្នាំមកហើយ គ្រោងនឹងដាក់សម្ពោធជាផ្លូវការ នៅដំណាច់ឆ្នាំ ២០១៦នេះ នេះបើយោងតាមការឲ្យដឹងកាលពីម្សិលមិញ ក្នុងជំនួបកិច្ចសន្ទនា រវាងសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងលោក ប្រាយុទ្ធ ច័ន្ទអូចា នាយករដ្ឋមន្រ្តីថៃ។

ផ្លូវរថភ្លើងនេះ ត្រូវផ្អាកដំណើរការដោយសារសង្រ្គាម និងវិបត្តិផ្សេងៗ ហើយការស្តារឡើងវិញនេះ នឹងជម្រុញដល់ការដឹកជញ្ជូនគ្រប់រូបភាព ជាពិសេសដើម្បីធ្វើសមាហរណកម្មតំបន់ ដោយតភ្ជាប់បណ្តាញផ្លូវដែកកម្ពុជា ទៅក្នុងគម្រោងផ្លូវដែកតំបន់អាស៊ាន។

កាលពីខែកញ្ញា កន្លងទៅនេះ ការតភ្ជាប់ផ្លូវដែកកម្ពុជា-ថៃប្រវែងជាង ៧គីឡូម៉ែត្រ បានបញ្ចប់រួចរាល់ជាស្ថាពរ ដោយមានការចូលរួមពីលោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន។

ក្រោយពេលផ្លូវដែកនេះដំណើរការ វានឹងជួយកាត់បន្ថយថ្លៃសេវាដឹកទំនិញ ក៏ដូចជាកាត់បន្ថយការកកស្ទះចរាចរណ៍ និងការដឹកទំនិញតាមផ្លូវជាតិ ហើយវាក៏ជម្រុញកំណើន និងពង្រីកទំហំសេដ្ឋកិច្ចរវាងទាំងពីរដល់ ១៥ពាន់លានដុល្លារ ក្នុងពេលដ៏ខ្លីខាងមុខផងដែរ។

គួររំលឹកដែរថា ផ្លូវដែកចាប់ពីភ្នំពេញ ដល់ក្រុងប៉ោយប៉ែត មានប្រវែងសរុប ៣៨៦គីឡូម៉ែត្រ ហើយក្រសួងសាធារណការ និងដឹកជញ្ជូន កំពុងបន្តជួសជុល និងសាងសង់ផ្លូវដែក រហូតដល់ទីរួមខេត្តបាត់ដំបង និងរហូតដល់ស្ថានីយ៍រថភ្លើងភ្នំពេញផងដែរ៕