PassApp Taxi ជាកម្មវិធីទូរស័ព្ទហៅម៉ូតូកង់បី និងរថយន្តតាក់ស៊ីម៉ែត្រ ក្នុងទីក្រុងភ្នំពេញ ដែលដាក់ដំណើរការកាលពីថ្ងៃទី ១២ ខែតុលា កន្លងទៅនេះ។ នេះបើយោងតាមប្រសាសន៍លោក តុប និមល ស្ថាបនិកក្រុមហ៊ុន PassApp Taxi។
លោកបានបន្តទៀតថា កម្មវិធីនេះ ជាកម្មវិធីថ្មីស្រឡាងមួយ ដែលនឹងដោះស្រាយបញ្ហារបស់អ្នកដំណើរ ដែលពិបាកហៅម៉ូតូកង់បី ឬរថយន្តតាក់ស៊ីម៉ែត្រ និងពិបាកក្នុងការតថ្លៃ។
កម្មវិធីនេះ បានអនុញ្ញាតិឲ្យអ្នកដំណើរអាចហៅម៉ូតូកង់បី ឬរថយន្តតាក់ស៊ីបាន ដោយមិនចាំបាច់តេហៅនោះទេ ព្រោះអ្នកដំណើរអាចមើលឃើញពីអ្នកបើកបរដែលទំនេរ និងស្ថិតនៅជិតជាងគេ ដែលអ្នកបើកបរ នឹងមកដល់ក្នុងរយ:ពេលយ៉ាងច្រើន ៨នាទី អាស្រ័យទៅតាមចម្ងាយ និងស្ថានភាពកកស្ទះ។
តម្លៃធ្វើដំណើរនៃម៉ូតូកង់បីគឺ ៣០០០៛ សម្រាប់មួយគីឡូម៉ែត្រដំបូង ហើយបន្ទាប់ពីនោះគឺ ១៤០០៛ក្នុងមួយគីឡូម៉ែត្រ។ សម្រាប់រថយន្តតាក់ស៊ីគឺ ៤០០០៛ សម្រាប់មួយគីឡូម៉ែត្រដំបូង ដែលបន្ទាប់ពីនោះគឺ ២៣០០៛ក្នុងមួយគីឡូម៉ែត្រ។
បច្ចុប្បន្នក្រុមហ៊ុន PassApp Taxi ក៏បានចាប់ដៃគូជាមួយ ក្រុមហ៊ុន EZGo និងសមាគមម៉ូតូកង់បី IDEA ដែលមានម៉ូតូកង់បីប្រមាណជា ៧០គ្រឿងបានចូលជាសមាជិក។
គួរបញ្ជាក់ដែរថាសេវាកម្មហៅម៉ូតូកង់បី ឬរថយន្តតាក់ស៊ីម៉ែត្រ តាមរយ:កម្មវិធីទូរស័ព្ទនេះ កំពុងមានការប្រកួតប្រជែងខ្លាំង នៅលើទីផ្សារបរទេស ខណ:ទីផ្សារកម្ពុជា កំពុងចាប់ផ្តើមប្រកួតប្រជែងហើយ៕
មតិយោបល់