Post News Media ព័ត៌មានសេដ្ឋកិច្ច មជ្ឈមណ្ឌលពាណិ...

មជ្ឈមណ្ឌលពាណិជ្ជកម្ម-លំនៅដ្ឋាន Star City នឹងលេចរូបរាង ជិតស្ពានអាកាសផ្សារដីហុយ

គម្រោងសាងសង់មជ្ឈមណ្ឌលពាណិជ្ជកម្ម Star City បាននិងកំពុងបង្ហាញវត្តមាន នៅទីក្រុងភ្នំពេញ តាមបណ្តោយផ្លូវសហព័ន្ធរុស្ស៊ី ជិតស្ពានអាកាសផ្សារដីហុយ ដែលនឹងដំណើរការ នាពេលចុងឆ្នាំ ២០១៧នេះ។ នេះបើយោងតាមការចេញផ្សាយរបស់គេហទំព័រហ្វេសប៊ុក Star City Cambodia។

Star City ជាមជ្ឈមណ្ឌលពាណិជ្ជកម្ម និងលំនៅដ្ឋាន ដែលគ្រោងនឹងសាងសង់ ៧អគារ និងមានកម្ពស់ ១២ជាន់ ក្នុងផ្ទៃក្រឡាប្រមាណជា ២ហិកតា ដែលត្រូវបានវិនិយោគដោយក្រុមហ៊ុន​ថៃប៊ុនរ៉ុង និងក្រុមហ៊ុនចិន។

គម្រោងនេះរំពឹងនឹងទទួលបានជោគជ័យ ដោយស្ថិតក្នុងទីតាំងពាណិជ្ជកម្មចម្រុះពិសេសថ្មីមួយ  ដែលមានអគារការិយាល័យ និងអគារស្នាក់នៅរួមគ្នា។

យ៉ាងណាមិញគម្រោងមួយនេះនៅមិនទាន់បានបង្ហាញពីចំនួនទឹកប្រាក់ពិតប្រាកដ នៅក្នុងការសាងសង់នៅឡើយនោះទេ​ ដោយក្រុមហ៊ុន និងដៃគូវិនិយោគត្រៀមនឹងចំណាយទុនរាប់រយលានដុល្លារអាមេរិក ដើម្បីសម្រេចគម្រោងមួយនេះ។

ស្ពានអាកាសផ្សារដីហុយ ស្ថាបនាសម្រេចបានប្រមាណជា ៣០ភាគរយហើយ គិតត្រឹមខែធ្នូ ឆ្នាំ ២០១៦កន្លងទៅនេះ ហើយគ្រោងនឹងបញ្ចប់ការសាងសង់ទាំងស្រុង នៅខែធ្នូ ឆ្នាំ ២០១៧ខាងមុខនេះ៕