បន្ទាប់ពីជាប់ឆ្នោតក្លាយជា ប្រធានាធិបតីនៃសហរដ្ឋអាមេរិក កាលពីពេលថ្មីៗនេះ លោក Donald Trump បានក្លាយជាប្រធានាធិបតី ដែលមានទ្រព្យច្រើនជាងគេបង្អស់ ក្នុងប្រវត្តិសាស្រ្តនៃប្រធានាធិបតីអាមេរិក ហើយលោកបានប្រកាសថា នឹងយកប្រាក់បៀវត្សតែ ១ដុល្លារអាមេរិកប៉ុណ្ណោះ ក្នុងមួយឆ្នាំ។ នេះបើយោងតាមសារព័ត៌មាន CBS’s 60 Minutes។

លោក Donald Trump បានសម្រេចចិត្តបោះបង់ប្រាក់បៀវត្សប្រចាំឆ្នាំ ៤សែនដុល្លារអាមេរិក ហើយយកត្រឹមតែ ១ដុល្លារអាមេរិកប៉ុណ្ណោះ ដែលនេះជាលក្ខខណ្ឌកំណត់ឲ្យលោកត្រូវតែទទួលយក។

លោក ក៏ធ្លាប់បានលើកឡើងតាំងពីមុនលោកជាប់ឆ្នោតថា ប្រាក់បៀវត្សមិនមែនជារឿងធំដុំសម្រាប់លោកឡើយ ហើយមិនមែនមានតែលោកនោះទេ ដែលជាប្រធានាធិបតីមិនយកប្រាក់បៀវត្ស គឺមាន Herbert Hoover នឹង Jonh F Kennedy ដែលបានបរិច្ចាគប្រាក់បៀវត្សទៅកាន់មនុស្សធម៌។

លើសពីនេះទៅទៀត លោក Trump បានក្លាយជាប្រធានាធិបតី ដែលទ្រព្យសម្បត្តិរហូតដល់ទៅ ៣.៧ពាន់លានដុល្លារអាមេរិក (Forbes) ជាប្រវត្តិសាស្រ្តថ្មីនៃប្រធានាធិបតីអាមេរិក ដែលមានទ្រព្យច្រើនជាងគេបំផុត។

គួរបញ្ជាក់ដែរថា លោក Donald Trump ជាមហាសេដ្ឋីវ័យ ៧០ឆ្នាំ ដែលប្រឡូកក្នុងវិស័យអចលនទ្រព្យ ហើយទើបនឹងបើកសណ្ឋាគារថ្មីមួយឈ្មោះ Trump International ក្នុងរដ្ឋ Washington ផងដែរ៕