ក្រសួងរៀបចំដែនដី នគរូបនីយកម្ម និងសំណង់ បានប្រកាសរៀបចម្ការប្រកួតប្រជែង ស្នាដៃស្ថាបត្យកម្មទូលំទូលាយលើគម្រោងប្លង់ស្ថាបត្យកម្មគំរូសម្រាប់បុរីលំនៅដ្ឋាន ដែលត្រូវមានសោភ័ណភាព និងអត្តសញ្ញាណស្ថាបត្យកម្មបែបខ្មែរទំនើបល្អឯក។ នេះបើយោងតាមសេចក្តីជូនដំណឹងកាលពីពេលថ្មីៗនេះរបស់ក្រសួងរៀបចំដែនដី នគរូបនីយកម្ម និងសំណង់។

លើសពីនេះទៅទៀត គម្រោងលំនៅដ្ឋាននេះ ក៏ត្រូវមានការយកចិត្តទុកដាក់អំពីគោលការណ៍អភិវឌ្ឍបៃតង និងលក្ខណ:ចីរភាពនៃស្ថាបត្យកម្មទាក់ទងទៅនឹង ទីតាំងភូមិសាស្រ្ត ទេសភាព សេដ្ឋកិច្ច សង្គម បរិស្ថាន និងវប្បធម៌ ព្រមទាំងការធ្វើសមាហរណកម្មក្នុងទីក្រុង។

សម្រាប់គម្រោងប្លង់ចូលរួមប្រកួតប្រជែង ដែលមានជាអាទិ៍ រួមមាន៖ ភូមិគ្រឹះ ភូមិគ្រឹះប្រណិត ផ្ទះល្វែង អគារស្នាក់នៅរួម ក្លោងទ្វារចូលបុរី របងបុរី សួនច្បារ កន្លែងក្មេងលេង។ល។

ការប្រកួតនេះ រៀបចំឡើងដើម្បីផ្តល់ឱកាសដល់ និស្សិត យុវជន មហាជន រូបវន្តបុគ្គលស្ថាបត្យករ និងនីតិបុគ្គល បានចូលរួមលើកកម្ពស់ការងារនគរូបនីយកម្មនៅកម្ពុជា និងបង្ហាញពីស្នាដៃរបស់កូនខ្មែរ។

គួរបញ្ជាក់ដែរថា ការទទួលពាក្យសុំចូលរួមប្រកួតប្រជែងមានរយ:ពេល ៣០ថ្ងៃ ចាប់ពីថ្ងៃទី ១៦ ខែវិច្ឆិកា ដល់ទី ១៥ ខែធ្នូ ឆ្នាំ ២០១៦៕

រូបតំណាង