មីយ៉ាន់ម៉ាៈ តាមការវិភាគរូបភាពផ្កាយរណប ពីអង្គការឃ្លាំមើលសិទ្ធិមនុស្ស បានឲ្យដឹងថា ផ្ទះជាង ១.០០០ ខ្នង ក្នុងភូមិរ៉ូហ៊ីងយ៉ា ត្រូវបានរដ្ឋាភិបាលមីយ៉ាន់ម៉ាវាយកម្ទេច និងដុតចោលនៅភាគពាយព្យនៃប្រទេស។ នេះបើយោង
តាមរយៈ សារព័ត៌មាន Channel News Asia ចេញផ្សាយថ្ងៃទី២១ ខែវិច្ឆិកា ឆ្នាំ២០១៦។

កងទ័ពមីយ៉ាន់ម៉ារាប់រយនាក់ បានដាក់ពង្រាយតាមបណ្តោយព្រំដែនបង់ក្លាដែស ដែលជាតំបន់ជនជាតិភាគតិច រ៉ូហ៊ីងយ៉ាម៉ូស្លីមរស់នៅមិនស្របច្បាប់ បន្ទាប់ពីមានការវាយប្រហារសម្លាប់ប៉ូលិស កាលពីខែមុន។

មន្រ្តីអង្គការសហប្រជាជាតិ បាននិយាថា មនុស្ស ៣០.០០០នាក់ បានរត់ភៀសខ្លួន ដោយសារអំពើហិង្សា ខណៈដែលរាប់សិបនាក់ទៀត បានស្លាប់បន្ទាប់ពីយោធាបាញ់ប្រហាពីលើឧទ្ធម្ភាគចក្រ ហើយក្នុងនោះដែរ កងកម្លាំងពិសេស បានសម្លាប់មនុស្សប្រមាណជា ៧០នាក់ និងចាប់ខ្លួនជាង ៤០០នាក់។

រដ្ឋាភិបាលមីយ៉ាន់ម៉ា បានឲ្យដឹងថា ផ្ទះជាង៣០០ខ្នង ត្រូវបានបំផ្លាញនៅក្នុងការវាយប្រហារ ជាមួយពួកសកម្មប្រយុទ្ធ ដោយសាការយល់ច្រឡំគ្នារវាងកងទ័ពរដ្ឋាភិបាល និងប្រជាជនរស់នៅតំបន់នោះ៕