បច្ចុប្បន្ននេះ មនុស្សប្រុសភាគច្រើនចូលចិត្តទៅក្លឹបហាត់ប្រាណ ដើម្បីទទួលបានសុខភាពល្អ និងរូបរាងសង្ហារ។ តែគួរឲ្យស្តាយ ប្រសិនបើអ្នកប្រឹងលើកដុំដែក ព្រោះតែចង់បានសាច់ដុំកង់ៗ ឬភាសារបច្ចេកទេហៅថា (6 Packs) នោះលោកអ្នកកំពុងប្រឈមមុខនឹងការអត់កូនប្រើហើយ។

យោងតាមការស្រាវជ្រាវថ្មីៗនេះ ដែលចេញផ្សាយតាមរយ:គេហទំព័រ boldsky បានបង្ហាញឲ្យដឹងថា ការប្រឹងហាត់ប្រាណហួសសមត្ថភាព អាចធ្វើឲ្យចំនួនមេជីវិតឈ្មោលមានការធ្លាក់ចុះជាលំដាប់។ ក្រុមអ្នកស្រាវជ្រាវបានធ្វើការពិសោធ ទៅលើបុរសដែលរៀបការហើយចំនួន ២៦១នាក់ មានអាយុចន្លោះពី២៥ទៅ៤០ឆ្នាំ និងសុខភាពល្អ ដោយរាប់មេជីវិតឈ្មោលមុនពេលឲ្យបុរសពាក់កណ្តាលធ្វើសកម្មភាពល្មមៗ ដូចជាការដើរហាត់ប្រាណ ៣៥នាទីក្នុងមួយថ្ងៃ និងពាក់កណ្តាលទៀតប្រឹងហាត់ឲ្យហួសកម្រិត ក្នុងមួយថ្ងៃ៥០ទៅ៦០នាទី។

បន្ទាប់ពីរយ:ពេល ១២សប្តាហ៍ បុរសទាំង២ក្រុមត្រូវបានអ្នកជំនាញធ្វើតេស្តមេជីវិតឈ្មោលម្តងទៀត។ លទ្ធផលបានបង្ហាញថា ចំនួនមេជីវិតឈ្មោល របស់ក្រុមបុរសដែលទទួលការហាត់ហួសកម្រិត មានការធ្លាក់ចុះគួរឲ្យតត់សម្គាល់ បើធៀបទៅនឹងក្រុមបុរសដែលទទួលការហាត់ល្មមៗ។

ជាចុងក្រោយក្រុមអ្នកស្រាវជ្រាវ បានសន្និដ្ឋានថា ការធ្លាក់ចុះនៃចំនួនមេជីវិតឈ្មោលនេះ បណ្តាលមកពីការបាត់បង់សារជាតិចិញ្ចឹមច្រើនលើសលប់ និងស្រកទម្ងន់លឿនពេក៕