ព័ត៌មានសុខភាព

រឿងគួរឲ្យខ្មាស់៧ចំណុច របស់ស្ត្រីមានផ្ទៃពោះ

នៅពេលមានផ្ទៃពោះ ស្ត្រីតែងតែកើតមានអាការ:មិនស្រួលខ្លួន ឬចង់ក្អួតចង្អោរ ជារៀងរាល់ព្រឹក។ ប៉ុន្តែ ក្នុងអំឡុងពេលនេះនៅមានរឿងគួរឲ្យខ្មាស់អៀនជាច្រើនទៀត ដែលស្ត្រីមានផ្ទៃពោះត្រូវជួបប្រទះ តែពួកគេមិនចង់ឲ្យអ្នកណាដឹងឡើយ។

១.កើតមុន
នៅពេលមានផ្ទៃពោះ ស្ត្រីនឹងកើតមុនកាន់តែច្រើនឡើង ដោយសារតែមិនអាចគ្រប់គ្រងអ័រម៉ូននៅក្នុងខ្លួនបាន។ ប៉ុន្តែ អ្នកមិនត្រូវធ្វើការព្យាបាលផ្តេសផ្តាសនោះទេ ដើម្បីសុវត្ថិភាពគួរតែពិភាក្សាជាមួយវេជ្ជបណ្ឌិត ឬអ្នកជំនាញផ្នែករោគស្ត្រី ដើម្បីរកវិធីដោះស្រាយ។

២.លេចនោមពេលកណ្តាស
ការកណ្តាស់ ឬក្អក ប្លោកនោមនឹងទទួលរងនូវសម្ពាធកាន់តែខ្លាំង ដែលអាចធ្វើឲ្យស្ត្រីវមានផ្ទៃពោះលេចនោមភ្លាមៗដែរ។

៣.ជើងធំជាងមុន
ទំហំជើងរបស់ស្ត្រីមានផ្ទៃពោះ អាចមានការប្រែប្រួលធំជាងមុន ដោយសារតែការឡើងទម្ងន់ ហើយជើងត្រូវរងសម្ពាធកាន់តែធ្ងន់។ បញ្ហាជើងធំ និងហើមជើងរបស់ស្ត្រីនឹងត្រលប់មកសភាពដើមវិញ បន្ទាប់ពីសម្រាលកូនរួច។ ប៉ុន្តែប្រសិនបើបំរែបំរួលមានលក្ខណ:ធ្ងន់ធ្ងរ ជើងរបស់អ្នកអាចនៅតែមានទំហំធំដដែល។

៤.ចេះតែភើ
ដោយសារតែទារកនៅក្នុងផ្ទៃកំពុងលូតលាស់ ទើបទារកត្រូវការជ្រៀតយកកន្លែងទំនេរកាន់តែច្រើនឡើងនៅក្នុងពោះ ហេតុនេះខ្យល់ជាច្រើនត្រូវបញ្ចេញមកក្រៅ។ ប៉ុន្តែមានវិធី ២យ៉ាងអាចបំបាត់អាការ:មួយនេះបាន គឺព្យាយាមញ៉ាំអាហារតិចតួចតែឲ្យបានញឹកញាប់ ឬសុំថ្នាំបំបាត់ជាតិហ្គាសពីវេជ្ជបណ្ឌិត។

៥.ចេញកន្ទួលក្រហមលើចុងសុដន់
នៅពេលដែលរាងកាយកំពុងតែបង្កកំណើតទារកក្នុងផ្ទៃ ចុងសុដន់របស់ស្ត្រីនឹងរីកធំឡើងត្រៀមសម្រាប់បំបៅដោះ។ ស្របពេលដែលចុងសុដន់កាន់តែរីកធំឡើងៗ ហើយប៉ះកកិតជាមួយនឹងអាវទ្រនាប់ទៀតនោះ វានឹងបណ្តាលឲ្យចេញជាកន្ទួលក្រហមកើតឡើង។ ដូច្នេះ សូមរក្សាសំណើមចុងសុដន់របស់អ្នកជានិច្ច និងចៀសវាងពាក់អាវដែលធ្វើឲ្យរោលកន្ទួល។

៦.ហៀរទឹកដោះប្រលាក់អាវ
ដោយសារតែសុដន់ត្រូវផលិតទឹកដោះត្រៀមសម្រាប់ចិញ្ចឹមទារកដែលកើតមក ទើបណ្តោលឲ្យមានបញ្ហាហៀរទឹកដោះកើតឡើង។ ប្រសិនបើមានបញ្ហានេះកើតឡើង អ្នកត្រូវប្រើក្រដាសជូតមាត់ទ្រាប់ពីលើក្បាលសុដន់ ដើម្បីឲ្យវាស្រូបយកទឹកដោះដែលហៀរចេញមក។

៧.បត់ជើងធំពេលសម្រាលកូន
នេះគឺជារឿងដ៏គួរឲ្យអាម៉ាសមួយទៀត ដែលស្ត្រីភាគច្រើនត្រូវឆ្លងកាត់នៅពេលដែលសម្រាលកូន។ ជាពិសេស នៅពេលដែលអ្នកប្រឹងបង្កើតកូន លាមកក៏បញ្ចេញមកតាមដែរ៕

មតិយោបល់