ខួរក្បាល គឺជាសរីរាង្គសំខាន់ជាងគេបំផុតនៅក្នុងចំណោមសរីរាង្គផ្សេងរបស់មនុស្ស ព្រោះវាជាអ្នកគ្រប់គ្រង និងបញ្ជារាល់សកម្មភាពទាំងអស់។ តែប្រសិនបើសរីរាង្គមួយនេះរងនូវការខូចខាតតែបន្តិច ការចង់ចាំនឹងមានហានិភ័យធ្លាក់ចុះ ហេតុនេះហើយអ្នកត្រូវប្រុងប្រយ័ត្នចំពោះការថែរក្សាខួរក្បាល។
យ៉ាងណាម៉ិញ បើយោងតាមគេហទំព័រ soha បានចុះផ្សាយកាលពីពេលថ្មីៗថា មានអាហារមួយចំនួនដែលអ្នកគួរជៀសឲ្យឆ្ងាយ ព្រោះវាអាចអាចបំផ្លាញ់ដល់ខួរក្បាលធ្ងន់ធ្ងរ។
១.អាហារចៀន ឬបំពង
ការសិក្សាមួយបានបង្ហាញថា អាហារដែលប្រើប្រេង ឬខ្លាញ់ ចម្អិនដោយប្រើកម្តៅសីតុណ្ហភាពលើស ២០០អង្សាសេ អាចបណ្តោលឲ្យខ្លាញ់មានជាតិអ៊ីដ្រូសែនកាន់តែច្រើនឡើង។
ខ្លាញ់ប្រភេទនេះហើយ ដែលអាចបណ្តោលឲ្យខួរក្បាលចាស់លឿន ខូចខាតដល់ការលូតលាស់នៃក្បាល និងបាត់បង់សតិ។
ដូច្នេះ អ្នកជំនាញសុខភាពបានផ្តល់អនុសាសន៍ ឲ្យមនុស្សគ្រប់គ្នាគួរកំណត់ការទទួលទានសាច់ ឬត្រីដែលបានដំណើរការដោយវិធីបំពង ចៀន អាំងមានជាប់ផ្សែង។
២.ទទួលទានអាហារប្រៃពេក
អំបិល គឺជាគ្រឿងទេសដែលមានសារធាតុចិញ្ចឹមដ៏សំខាន់សម្រាប់រាងកាយរបស់មនុស្ស។ តែទោះជាយ៉ាងណា ទម្លាប់ញ៉ាំអាហារដែលមានជាតិប្រៃខ្ពស់ពេក អាចបង្កគ្រោះថ្នាក់ដល់រាងកាយ ជាពិសេសខួរក្បាល។
ការបរិភោគប្រៃមិនត្រឹមតែប្រឈមនឹងហានិភ័យនៃការឡើងសម្ពាធឈាមខ្ពស់ និងជំងឺក្រិនសរសៃឈាមប៉ុណ្ណោះទេ ថែមទាំងខូចសរសៃឈាម និងរាំងស្ទះដល់ការផ្គត់ផ្គងឈាមទៅកាន់ខួរក្បាលផងដែរ។
ហេតុនេះហើយ អ្នកជំនាញបានផ្តល់អនុសាសន៍ថា មនុស្សពេញវ័យមិនគួរប្រើប្រាស់អំបិលលើសពី៧ក្រាមក្នុងមួយថ្ងៃឡើយ។ រីឯកុមារ ត្រូវកំណត់ត្រឹមតែ ៤ក្រាមក្នុងមួយថ្ងៃបានហើយ។
៣.អាហារមានជាប់ថ្នាំសម្លាប់សត្វល្អិត
មុននឹងញ៉ាំអាហារផ្សេងៗ ជាបឋមអ្នកគួរតែយកចិត្តទុកដាក់ឲ្យបានហ្មត់ចត់ចំពោះការលាងសម្អាត ជាពិសេសសម្រាប់បន្លែ និងផ្លែឈើតែម្តង។ តែប្រសិនបើអ្នកទទួលទានអាហារដែលមានជាប់ថ្នាំសម្លាប់សត្វល្អិត អ្នកអាចប្រឈមនឹងជំងឺរាគរូស ពុល ហើយវាអាចជ្រាបទៅអាចបំផ្លាញកោសិកាខួរក្បាលថែមទៀត។
៤.អាហារមានជាតិស្ករច្រើន
ការបរិភោគស្ករក្នុងកម្រិតមធ្យម មិនបង្កឲ្យមានផលប៉ះពាល់ដល់រាងកាយនោះទេ។ ប៉ុន្តែប្រសិនបើអ្នកទទួលទានជាតិស្ករច្រើនក្នុងរយ:ពេលយូរ អាចធ្វើឲ្យរាងកាយប្រឈមនឹងបញ្ហាផ្សេងៗ ជាពិសេសអាចបំផ្លាញកោសិកាខួរក្បាលរបស់កុមារ ដែលបង្កឲ្យប៉ះពាល់ដល់ការអភិវឌ្ឍបញ្ហាធ្ងន់ធ្ងរ៕
មតិយោបល់