អាការហើមដៃ ហើមជើង និងមុខ ក្នុងអំឡុងពេលមានផ្ទៃពោះ គឺដោយសារតែជាតិទឹកប្រមូលផ្តុំនៅក្នុងកោសិកាច្រើនពេក ក៏ប៉ុន្តែមិនមែនមាន័យថា អ្នកត្រូវកាត់បន្ថយការទទួលទានទឹកនោះទេ នេះបើយោងតាមលោកវេជ្ជបណ្ឌិត Nandanwar នៅទីក្រុង បុមបៃ បានមានប្រសាសន៍។
លោកវេជ្ជបណ្ឌិតបានបង្ហាញទៀតថា «ក្នុងរាងកាយរបស់យើងមានផ្ទុកជាតិទឹករហូត ៨០ភាគរយ ក៏ប៉ុន្តែការទទួលទានទឹកច្រើនជ្រុល ឬតិចពេកអាចរារាំងដល់ការបូមឈាម ដែលបណ្តោលឲ្យមានហានិភ័យហើមកើតឡើង។ លើសពីនេះទៅទៀត ការបញ្ចេញអ័រម៉ូន Progesterone ក្នុងពេលមានផ្ទៃពោះច្រើនពេក ធ្វើឲ្យជាតិទឹកត្រូវបានឃាត់ទុកនៅក្នុងរាងកាយ ហើយករណីហើមក៏កើតឡើងដូចគ្នាដែរ»។
ទោះជាយ៉ាងណា ការប្រមូលផ្តុំនៃការសារធាតុរាវនៅក្នុងរាងកាយមិនមែនជាមូលហេតុតែមួយគត់ដែលធ្វើឲ្យហើមនោះទេ។ នៅមានមូលហេតុផ្សេងទៀត រួមបញ្ចូលទាំងកង្វះប្រូតេអ៊ីន ខ្វះឈាម ជំងឺបេះដូង និងកំណកឈាម។ ដូច្នេះ យកល្អអ្នកគួរតែប្រញាប់ទៅពិគ្រោះជាមួយគ្រូពេទ្យជំនាញឲ្យបានកាន់តែឆាប់កាន់តែល្អ ប្រសើរជាងការព្យាបាលដោយខ្លួនឯងនៅផ្ទះ។
ម្យ៉ាងវិញទៀត លោកវេជ្ជបណ្ឌិត Nandanwar បានផ្តល់អនុសាសន៍ថា ស្ត្រីមានផ្ទៃពោះគួរតែទទួលទានទឹកយ៉ាងហោចណាស់ ១០ទៅ១២កែវ (ប្រហែលជា៣ ទៅ៤លីត្រ) ក្នុងមួយថ្ងៃ ទើបគ្រប់គ្រាន់។ ដូច្នេះ អ្នកត្រូវចងចាំថា នៅពេលដែលជួបនឹងបញ្ហាហើមដៃ ជើង និងមុខ ក្នុងអំឡុងពេលមានផ្ទៃពោះ អ្នកពុំគួរទទួលកាត់បន្ថយការទទួលទានទឹកនោះឡើយ៕
មតិយោបល់