មនុស្សភាគច្រើនតែងតែយល់ថា មុន កើតមាននៅលើផ្ទៃមុខតែប៉ុណ្ណោះ ហើយតំបន់ឯកជនវិញ គឺមានតែជំងឺកាមរោគនោះទេ។ ប្រសិនបើអ្នកយល់បែបនេះមែន សូមគិតឡើងវិញម្តងទៀត ព្រោះមុនអាចកើតមានគ្រប់ផ្នែកទាំងអស់នៅលើរាងកាយរបស់យើង សូម្បីតែតំបន់ឯកជន ក៏មិនលើកលែងដែរ។ ជាពិសេស នៅពេលដែលរន្ធរោមត្រូវបានកកស្ទះ រួមទាំងការឆ្លងបាក់តេរី ទៀតនោះ មុន នឹងផ្ទុះឡើង។

ភាពខុសគ្នាតែមួយគត់រវាង មុន នៅលើផ្ទៃមុខ និង មុន នៅលើតំបន់ឯកជន គឺការឈឺចាប់។ តំបន់ឯកជន អាចមានការឈឺចាប់ខ្លាំងជាង ហើយអាចប៉ះពាល់ដល់សុខភាពថែមទៀត។ ខាងក្រោមនេះ គឺជាហេតុផលមួយចំនួនដែលធ្វើឲ្យស្រីៗកើតមុន ត្រង់តំបន់ឯកជន:

១.បញ្ហាអ័រម៉ូន
ភាគច្រើន មុន តែងតែកើតមាននៅលើផ្ទៃមុខ ក៏ប៉ុន្តែត្រង់តំបន់ឯកជនក៏អាចកើតមានបានដែរ ដោយសារតែមូលហេតុតែមួយ។ មូលហេតុសំខាន់នោះគឺ ការប្រែប្រួលនៃកម្រិតអ័រម៉ូន និងការកើនឡើងនៃបាក់តេរី ដែលអាចបណ្តោលឲ្យអ្នកចេញមុនគ្រប់កន្លែង កុំថាឡើយតំបន់ឯកជន។

២.ការកោររោម
ការសម្អាតរោមចេញពីតំបន់ឯកជន អាចបណ្តោលឲ្យរលាក ឆ្លងមេរោគបង្កទៅជាមុន ហើយរោមដុះមកវិញកាន់តែធំ។ យកល្អកុំធ្វើអ្វីផ្តេសផ្តាសចំពោះរោមនៅតំបន់នេះ តែប្រសិនបើវាវែងពេក អ្នកអាចប្រើកន្ត្រៃកាត់ចេញបាន ព្រោះវិធីនេះមិនធ្វើឲ្យរលាកស្បែកនោះទេ។

៣.ស្លៀកខោរឹបតឹងពេក
ទម្លាប់ស្លៀកខោតឹងណែនខ្លាំងពេក ធ្វើឲ្យស្បែកត្រង់តំបន់នេះគ្មានខ្យល់ដកដង្ហើមបានគ្រប់គ្រាន់ ហើយងាយនឹងបង្កទៅជាសំណើម។ នេះជាឱកាសល្អសម្រាប់ពពួកបាក់តេរីផ្សេងៗបង្កបង្កើតកូនចៅកាន់តែច្រើនទៅៗ ទីបំផុតបញ្ហាស្បែកត្រង់កន្លែងនេះនឹងកើតមាន។

៤.ផលិតផលសម្អាត
តំបន់ឯកជន ត្រូវទាមទារឲ្យមានការសម្អាតដោយមានការប្រុងប្រយ័ត្ន ប៉ុន្តែមនុស្សភាគច្រើនតែងតែប្រើប្រាស់សាប៊ូ ឬផលិតផលផ្សេងៗទៅវិញ។ អ្នកត្រូវដឹងថា ផលិតផលភាគច្រើនមានផ្ទុកសារធាតុគីមី ដែលរំខានដល់កម្រិត pH នៃតំបន់ឯកជន ដែលជាហេតុធ្វើឲ្យវាមានបញ្ហារមាស់ រលាក និងមានក្លិនមិនល្អថែមទៀត។

៥.បែកញើសក្នុងពេលគេង
ប្រសិនបើអ្នកកំពុងតែមានបញ្ហា មុន ត្រង់តំបន់ឯកជន គួរតែគេងដោះសម្លៀបំពាក់ចេញប្រសើរជាង។ ព្រោះការគេងទាំងសម្លៀកបំពាក់អាចបង្កឲ្យបែកញើស ហើយបញ្ហាកើតមុនកាន់តែអាក្រក់ឡើងៗ៕

ប្រភព: boldsky