បាត់ដំបងៈ សមត្ថកិច្ចធ្វើការបង្ក្រាបករណីរក្សាទុកដឹកជញ្ជូន ឬជួញដូរដោយខុសច្បាប់នូវសារធាតុញៀន ឃាត់ខ្លួនបានជនសង្ស័យម្នាក់និងវត្ថុតាងមួយចំនួន។

ប្រតិបត្តិការនេះបានធ្វើឡើងនៅវេលាម៉ោង៤រសៀល ថ្ងៃទី១៣ ខែកក្កដា ឆ្នាំ២០១៧ ត្រង់ចំណុចក្រុមទី១៧ ភូមិស្លាកែត សង្កាត់ស្លាកែត ក្រុងបាត់ដំបង ខេត្តបាត់ដំបង។

ប្រភពព័ត៌មានបានឲ្យដឹងថា កម្លាំងជំនាញអធិការដ្ឋាននគរបាលក្រុងបាត់ដំបង បានចុះបង្ក្រាបឃាត់ខ្លួនជនសង្ស័យករណីរក្សាទុក ដឹកជញ្ជូន ឬជួញដូរដោយខុសច្បាប់នូវសារធាតុញៀន ឃាត់ខ្លួនជនសង្ស័យម្នាក់ ដែលមានឈ្មោះ រី សាត ភេទប្រុស អាយុ៣១ឆ្នាំ រស់នៅភូមិស្លាកែត សង្កាត់ស្លាកែត ក្រុងបាត់ដំបង ខេត្តបាត់ដំបង។

វត្ថុតាងដកហូតរួមមានមាន ថ្នាំញៀនប្រភេទ(ICEទឹកកក)ចំនួន៣៦កូនថង់តូច ទម្ងន់៥.៤៨ក្រាមទាំងសំបក កូនកាបូបចំនួន១ បំពង់ទុយោសំរាប់ចូករំលែកថ្នាំញៀនចំនួន១ ទូរសព្ទដៃម៉ាកអិនចុចពិលចំនួន១គ្រឿង និងដែកកេះចំនួន១។

បច្ចុប្បន្ន ជនសង្ស័យនិងវត្ថុតាងត្រូវបានបញ្ជូនមកកាន់អធិការដ្ឋាននគរបាលក្រុងបាត់ដំបង រៀបចំកសាងសំណុំរឿងបញ្ជូនទៅផ្នែកជំនាញ និងបន្តទៅសាលាដំបូង ដើម្បីផ្តន្ទាទោសតាមផ្លូវច្បាប់៕