ប្រភេទនៃជំងឺមហារីកដែលគួរឲ្យខ្លាចបំផុតនៅក្នុងចំណោមជំងឺមហារីកទាំងអស់ គឺជំងឺមហារីកស្បូន។ ជំងឺនេះត្រូវបានគេរកឃើញមានអត្រាខ្ពស់បំផុត ដែលបង្កឡើងដោយសារតែការឆ្លងមេរោគ HPV ពីមនុស្សម្នាក់ទៅកាន់មនុស្សម្នាក់ទៀត តាមរយ:ការរួមភេទ។ ប្រសិនបើប្រព័ន្ធភាពស៊ាំរបស់អ្នកមានភាពរឹងមាំអាចទប់ទល់នឹងមេរោគ HPV បាន ក៏ប៉ុន្តែប្រសិនបើប្រព័ន្ធភាពស៊ាំខ្សោយវិញនោះ អ្នកច្បាស់ជាឆ្លងមេរោគនេះ ហើយវិវត្តទៅជាជំងឺមហារីកស្បូនជាមិនខាន។

ខាងក្រោមនេះ គឺជារោគសញ្ញាមួយចំនួននៃជំងឺមហារីកមាត់ស្បូន៖

ឈឺចាប់ ឬហូរឈាម
ប្រសិនមានការហូរឈាមតាមទ្វារមាស និងមានអារម្មណ៍ឈឺចាប់នៅក្នុងតំបន់អាងត្រគាក វាអាចជារោគសញ្ញានៃជំងឺមហារីកមាត់ស្បូន។ នេះដោយសារតែការលូតលាស់មិនប្រក្រតីនៃកោសិកាមហារីក ដែលបណ្តោលឲ្យជញ្ជាំងនៃមាត់ស្បូនមានសភាពស្ងួត និងប្រេះ។ ហេតុនេះ ត្រូវចាំថា ប្រសិនបើអ្នកមានការហូរឈាមខុសប្រក្រតី ដែលមិនមែនជាឈាមរដូវ គួរតែប្រញាប់ទៅជួបគ្រូពេទ្យភ្លាម។

ខ្វះឈាម
ជំងឺមហារីកមាត់ស្បូនអាចបណ្តោលឲ្យមានការហូរឈាមហួសប្រមាណ ហើយទីបំផុតអ្នកនឹងមានបញ្ហាខ្វះឈាម។ អាការខ្វះឈាម អាចបណ្តោលឲ្យអ្នកគ្មានកម្លាំងកំហែង ហើយបេះដូងលោតញាប់ផងដែរ។

បញ្ហាពេលបត់ជើងតូច
ប្រសិនបើអ្នកលំបាកក្នុងការនោម ក៏អាចជាសញ្ញានៃជំងឺមហារីកមាត់ស្បូនដែរ ព្រោះស្បូនចាប់ផ្តើមហើម ហើយប្លោកនោម និងតម្រងនោមមានភាពទន់ខ្សោយ ដែលជាឧបសគ្គក្នុងការបត់ជើងតូច។

ឈឺជើង និងត្រគាកខាងក្រោយ
នៅពេលដែលមាត់ស្បូនមានសភាពហើម អាចប៉ះពាល់ដល់តម្រងនោម និងប្លោកនោម ហើយវានឹងដាក់សម្ពាធទៅលើសរសៃឈាម។ ការរាំងស្ទះលំហូរឈាមទៅកាន់ឆ្អឹងត្រគាក និងជើងអាចបង្កឲ្យមានការឈឺចាប់ ហើយវាក៏អាចបណ្តោលឲ្យកជើង និងជើងហើមផងដែរ។

ដុះប្រជ្រុយ ឬដុំសាច់តូចៗ
ប្រសិនបើអ្នកមានដុះប្រជ្រុយ ឬដុំសាច់តូចៗ នៅមាត់ស្បូន ឬខាងក្រៅនៃរាងកាយ ជាសញ្ញានៃការឆ្លងមេរោគ HPV។ នេះហើយជាឱកាសវិវត្តទៅជាជំងឺមហារីកមាត់ស្បូន មានការកើនឡើងខ្ពស់បំផុត។

ស្រកទម្ងន់
ការស្រកទម្ងន់ ក៏ជារោគសញ្ញាមួយនៃការកើតមានជំងឺមហារីកមាត់ស្បូនដែរ។ ព្រោះខណ:ពេលដែលស្បូនហើម វាអាចដាក់សម្ពាធទៅលើក្រពះ ហើយអ្នកនឹងលែងមានចំណង់អាហារ។

រោគសញ្ញាទាំងនេះក៏អាចច្រឡំជាមួយនឹងជំងឺមួយចំនួនទៀតដែរ ប៉ុន្តែដើម្បីដឹងច្បាស់អ្នកគួរតែប្រញាប់ធ្វើតេស្តឲ្យបានត្រឹមត្រូវ៕

ប្រភព: rak sukapa