ជារឿយៗ ដើម្បីលាក់បាំងស្នាមអុជខ្មៅនៅលើស្បែក តើអ្នកតែងតែប្រើប្រាស់គ្រឿងសម្អាងមែនទេ? អ្នកត្រូវដឹងថា វិធីមួយនេះមិនអាចបិទបាំងបានជារៀងរហូតនោះទេ ក្រោយពេលលាងសម្អាតផ្ទៃមុខ អ្នកនឹងឃើញស្នាមខ្មោអណ្តែតត្រឡប់មកវិញ។ ដូច្នោះ តើយើងគួរធ្វើដូចម្តេច? កុំបារម្ភខ្លាំងពេក មិនមែនអត់វិធីដោះស្រាយនោះទេ អ្នកអាចប្រើប្រាស់វិធីធម្មជាតិងាយៗ៣យ៉ាង ស្នាមអុជខ្មៅនៅលើផ្ទៃមុខនឹងរលប់បន្តិចម្តងៗរហូតបាត់ស្រមោល។

ខាងក្រោមនេះ គឺជារបៀបប្រើប្រាស់ផ្លែឈើ៣ប្រភេទ ដើម្បីកម្ចាត់បញ្ហាស្នាមអុជខ្មៅនៅលើផ្ទៃមុខ៖

ផ្លែល្ហុងទុំ៖
១.ពុះល្ហុះមួយចំណិតឆ្កឹះយកគ្រាប់ និងសរសៃចេញពីផ្លែល្ហុងឲ្យស្អាត។
២.ចូកយកសាច់ល្ហុងក្នុងចានមួយ រួចប្រើស្លាបព្រាកិនឲ្យម៉ត់ជាល្បាយខាប់ៗ។
៣.ចាប់ផ្តើមអនុវត្តនៅលើផ្ទៃមុខឲ្យសព្វ។
៤.ទុកឲ្យល្បាយធ្វើសកម្មភាពរយ:ពេល ៣០នាទី ទើបលាងសម្អាតចេញជាមួយទឹកធម្មតា។
៥.សូមព្យាយាមអនុវត្តនៅពេលល្ងាចជាប្រចាំ។

ប៉េងប៉ោះទុំ៖
១.ពុះប៉េងប៉ោះទុំពីរបីផ្លែ ឆ្កឹះយកគ្រាប់ចេញឲ្យអស់។
២.កិនរហូតក្លាយទៅជាល្បាយ។
៣.ចាប់ផ្តើមលាបនៅលើផ្ទៃមុខដោយប្រើកម្លាំងថ្នមៗ។
៤.ទុករយ:ពេល ១៥នាទី ទើបលាងសម្អាតជាមួយនឹងទឹកក្តៅឧណ្ឌៗ។
៥.សូមព្យាយាមអនុវត្តជារៀងរាល់ថ្ងៃ ដើម្បីឆាប់ទទួលបានផល។

ទឹកក្រូចឆ្មារ៖
១.អ្នកគ្រាន់តែពុះយកក្រូចឆ្មារមួយចំណិត ហើយច្របាច់យកទឹកលាបត្រង់កន្លែងដែលមានស្នាមអុជខ្មៅ។
២.ទុករយ:ពេល ១០ ទៅ ១៥នាទី ទើបលាងជម្រះជាមួយនឹងទឹកត្រជាក់ធម្មតា។
៣.ដើម្បីទទួលបានប្រសិទ្ធភាព ហើយធានាសុវត្ថិភាពចំពោះស្បែកសូមអនុវត្តនៅពេលល្ងាច។

នៅក្នុងចំណោមវិធីសាស្ត្រធម្មជាតិទាំង៣យ៉ាង ដែលបានបង្ហាញខាងលើនេះ អ្នកអាចប្រើមួយណាក៏បានដែរ ប្រសិនបើគិតថាងាយស្រួល៕

ប្រភព៖ boldsky