នៅក្នុងចំណោមកំហុសទាំង ៥យ៉ាងខាងក្រោមនេះ យ៉ាងហោចណស់មាន ១ករណី ដែលមនុស្សភាគច្រើនតែងតែធ្វើខុសក្នុងកំឡុងពេលចម្អិនស៊ុត។ ដូច្នេះ ដើម្បីចម្អិនស៊ុតឲ្យបានត្រឹមត្រូវ និងការពារមិនឲ្យបាត់បង់សារធាតុចិញ្ចឹម អ្នកគួរតែចៀសវាងប្រការទាំងអស់នេះ។

១. ដាក់ចម្អិនស៊ុតនៅពេលទឹកកំពុងតែពុះ
ការដាក់ចម្អិនស៊ុតនៅពេលដែលទឹកកំពុងតែពុះអាចនាំឲ្យបែកសំបក ហើយធ្លាយស៊ុតចេញមកក្រៅ។ មិនតែប៉ុណ្ណោះ ការធ្វើបែបនេះអាចបាត់បង់នូវតម្លៃសារធាតុចិញ្ចឹមថែមទៀត។

ដើម្បីចម្អិនស៊ុតឲ្យបានត្រឹមត្រូវ អ្នកត្រូវចម្អិននៅក្នុងកំសៀវ ហើយបន្ទាប់ពីទឹកពុះត្រូវបន្ថយកម្តៅឲ្យពុះតិចៗចំនួន ៣នាទី។ អនុវត្តវិធីនេះ កម្តៅនៅក្នុងកំសៀវអាចរក្សាបានល្អ ហើយស៊ុតមិនបែកសំបក។

២. មិនបានត្រាំស៊ុតនៅក្នុងទឹកត្រជាក់
ប្រសិនបើអ្នកមិនដាក់ត្រាំស៊ុតក្នុងទឹកត្រជាក់ សីតុណ្ហភាពនៅមានកម្រិតខ្ពស់ដដែល ដូច្នេះស៊ុតនឹងបាត់បង់ប្រូតេអ៊ីន ហើយពិបាកបកសំបកចេញ។

ដូច្នេះហើយ បន្ទាប់ពីស្រង់ស៊ុតចេញពីទឹកក្តៅភ្លាម អ្នកត្រូវត្រាំទឹកត្រជាក់ភ្លាម ទើបអាចការពារសារធាតុចិញ្ចឹមមិនឲ្យបាត់បង់ ហើយងាយស្រួលក្នុងការបក។

៣. ប្រើឆ្នាំងខុសទំហំ
កំហុសដ៏តូចមួយទៀតដែលស្ត្រីមេផ្ទះតែងតែធ្វើ គឺចម្អិនស៊ុតច្រើនគ្រាប់នៅក្នុងឆ្នាំតូចមួយ។ ការប្រើឆ្នាំតូចអាចធ្វើឲ្យកម្តៅមិនស្មើ និងងាយបង្កឲ្យប្រេះបែក។

ផ្ទុយទៅវិញអ្នកគួរតែជ្រើសយកឆ្នាំធំ ហើយការតម្រៀបស៊ុតមិនជាន់លើគ្នា ទើបអាចចម្អិនស៊ុតឆ្អិនបានល្អ។

៤. ចម្អិនស៊ុតយូរពេក
កាលណាអ្នកចម្អិនស៊ុតយូរខ្លាំងពេក ស៊ុតលឿងនឹងប្រែជាពណ៌ប្រផេះ ឬខៀវ ដែលធ្វើឲ្យខូចតម្លៃអាហាររូបត្ថម្ភ។
បែបនេះអ្នកមិនត្រូវចម្អិនស៊ុតយូរពេកនោះទេ អ្នកអាចចម្អិនក្នុងរយៈពេល ១០(ប្រសិនបើចង់ញ៉ាំស៊ុតជ័រព្នៅ) ឬ ១៥នាទី (ប្រសិនបើចង់ញ៉ាំស៊ុតឆ្អិនល្អ)។

៥. ការបន្ថែមអំបិលពេលដែលស្ងោរស៊ុត
ទោះបីជាវិធីនេះជារឿងធម្មតា ប៉ុន្តែការប្រើអំបិលក្នុងពេលស្ងោរស៊ុតមិនមែនជាជម្រើសល្អបំផុតនោះឡើយ។

ប្រសិនបើអ្នកចង់ឲ្យស៊ុតទន់ ហើយមានរសជាតិឆ្ងាញ់ នៅពេលដែលអ្នកស្ងោរស៊ុតជិតឆ្អិនសូមបន្ថែមទឹកខ្មេះ ១ស្លាបព្រា ហើយកូរឲ្យសព្វ រយៈពេល ៣ ទៅ ៤នាទីក្រោយ ទើបលើកចេញ៕