ព្រៃវែងៈ សកម្មភាពដឹកជញ្ជូនសត្វពាហនៈពីវៀតណាម មានជ្រូក មាន់ ទា តាមច្រកចក្រី ត្រូវគេមើលឃើញថា នៅតែបន្តមានជាហូរហែរតាមរដូវកាល តែមិនសូវចូលតាមច្រកទ្វារនោះទេ ភាគច្រើនមកតាមផ្លូវទឹក។ ជាក់ស្ដែង គឺសត្វទាតែម្ដង ជារៀងរាល់លើក ឈ្មួញពុំបានដឹកចូលតាមច្រកទ្វារទេ គឺចូលមកតាមផ្លូវទឹក ដែលជានីតិវិធីបង្វៀងរបស់មន្ត្រីជំនាញ និងច្រក ខណៈពុំមានច្បាប់អនុញ្ញាតនាំចូលផងនោះ។

ប្រភពពីកម្មករចាប់ទា បានឲ្យដឹងថា ពួកគាត់ចាប់ទា យកទៅលក់ឯភ្នំពេញ ដោយទិញពីឈ្មួញវៀតណាម ក្នុងតម្លៃ១ក្បាល៧៥០០រៀល ហើយពេលយកដល់ភ្នំពេញ លក់បានមួយក្បាល១ម៉ឺនរៀល។

រីពលរដ្ឋមូលដ្ឋានបានឲ្យដឹងថា សត្វទាទាំងនេះ គឺគេតែងតែដឹកពីប្រទេសវៀតណាម ជាញឹកញាប់ចូលមកខ្មែរ តាមទូកនៅខាងត្បូងមាត់ច្រកអន្តរជាតិចក្រី។ នៅពេលមកដល់ច្រាំងទន្លេ គឺឈ្មួញបានចាប់ពីទូកដាក់ក្នុងស្បៃ រួចក៏បន្តចាប់ដាក់ឡានយកទៅលក់ ឬចែកចាយតាមបណ្ដាខេត្តផ្សេងៗដល់ភ្នំពេញ។

ប្រភពបន្តថា សត្វទាដែលដឹកពីវៀតណាម ឈ្មួញមិនដឹកចូលតាមច្រកទ្វារទេ បែរដឹកមកតាមទូកបែបនេះ គឺទំនងមានការរៀបចំពីខាងពេទ្យសត្វ និងប្រធានច្រក ព្រោះថា អត់ច្បាប់នាំចូល ដូច្នេះក៏មានការត្រូវរ៉ូវគ្នារវាងឈ្មួញ និងមន្ត្រីជំនាញឲ្យចូលមកតាមទូកបែបនេះទៅ។

គួរបញ្ជាក់ផងដែរ ច្រកទ្វារអន្តរជាតិចក្រី បច្ចុប្បន្នល្បីល្បាញខាងរៀបវិធីគៀបយកលុយពីឈ្មួញ ដែលដឹកទំនិញចេញចូលគ្រប់ប្រភេទ ជាក់ស្ដែងដូចជា ស្រូវ ស្វាយ ដែលធ្វើឲ្យពលរដ្ឋរិះគន់។ អ្វីដែលគួឲ្យកត់សម្គាល់ជាងនេះទៅទៀតនោះ ដូចជា សត្វទា ដែលមិនមានច្បាប់នាំចូលសោះ តែបែរជាមន្ត្រីជំនាញ និងច្រកអាចបង្វែរឲ្យចូលតាមផ្លូវទឹក ដោយរលូន។

ពាក់ព័ន្ធករណីខាងលើ លោក ទួន សុគន្ថា ប្រធានស្នាក់ការច្រកចក្រី បានបកស្រាយទាំងមិនទំនងថា សត្វទាដែលដឹកទាំងនោះ គឺអាចខ្មែរ ទៅជួលចិញ្ចឹមនៅវៀតណាម ជាទាពង រួចក៏ដឹកមកវិញ។

រីឯលោក ចិន វិសាល ប្រធានការិយាល័យផលិតកម្ម និងបសុព្យាបាលខេត្តព្រៃវែង បានឲ្យដឹងថា ក្នុងឆ្នាំ២០១៦នេះ គឺមិនទាន់មានច្បាប់នាំចូលសត្វទានោះទេ ប៉ុន្តែលោកថា នឹងឲ្យកម្លាំងចុះទៅពិនិត្យជាក់ស្ដែង លើករណីនាំចូលសត្វទាពីប្រទេសវៀតណាមនេះ៕