(ណៃពិដោ)៖ ប្រធានាធិបតីមីយ៉ាន់ម៉ា យូ ធីន យ៉រ (U Htin Kyaw) បានដាក់សំណើថ្មីទៅកាន់សភាជាតិ ដើម្បីដកដាក់តំណែងនៅក្នុងជួររដ្ឋាភិបាលមួយចំនួន ដោយក្នុងនោះលោកស្រី អោងសាន ស៊ូជី នឹងត្រូវបន្ថយមកកាន់តំណែងត្រឹមតែពីរក្រសួងប៉ុណ្ណោះ គឺក្រសួងការបរទេស និង ការិយាល័យប្រធានាធិបតី។ នេះបើតាមការចេញផ្សាយ ដោយទីភ្នាក់ងារព័ត៌មានចិនស៊ិនហួរ នារសៀលថ្ងៃចន្ទ ទី០៤ ខែមេសា ឆ្នាំ២០១៦។
សម្រាប់តំណែងរដ្ឋមន្ត្រីក្រសួងអប់រំប នឹងត្រូវប្តូរទៅឲ្យលោក U Myo Thein Gyi និង ក្រសួងថាមពល និង អគ្គិសនីបានទៅលើលោក U Pe Zin Tun។ មន្ត្រីដែលឡើងកាន់តំណែងទាំងអស់សុទ្ធសឹងតែ ជាសមាជិកជាប់ឆ្នោតរបស់គណបក្សសម្ព័ន្ធដើម្បីប្រជាធិបតេយ្យ (NLD) របស់លោកស្រី ស៊ូជី។
ដោយឡែកខាងយោធាក៏បានដាក់សំណើមកកាន់ប្រធានាធិបតីឲ្យតែងតាំងលោក U Tun Tun Oo ជាអគ្គព្រះរាជអាជ្ញាផងដែរ។ សម្រាប់ការអនុម័តទាំងអស់ពីសភា នឹងត្រូវធ្វើឡើងនៅថ្ងៃអង្គារ ប្រសិនបើមិនមានការជំទាស់ណាមួយ រហូតដល់ម៉ោង ៦ល្ងាចថ្ងៃចន្ទ នេះ៕