អ្នកគាំទ្របាល់ទាត់កម្ពុជា-ទីម័រ បង្ខំចិត្តត្រឡប់ទៅផ្ទះ ព្រោះអត់កន្លែងអង្គុយ

ភ្នំពេញៈ ដូចការគ្រោងទុក នៅបរិវេណពហុកីឡដ្ឋានជាតិអូឡាំពិក មានមនុស្សប្រមាណពី៤-៥ម៉ឺននាក់ កំពុងចូលទៅទស្សនាការប្រកួតបាល់ទាត់មិត្តភាពកម្ពុជា-ទីម័រ។ ប៉ុន្តែតាមទិដ្ឋភាពជាក់ស្ដែង អ្នកគាំទ្របានកើនឡើងលើសកំណត់ធ្វើឲ្យខ្វះកន្លែងអង្គុយ ហើយអ្នកខ្លះក៏បង្ខំចិត្តត្រឡប់ទៅផ្ទះវិញ។

យ៉ាងណាក៏ដោយ រហូតមកទល់ម៉ោងជិត៦នេះ អ្នកគាំទ្រវិស័យកីឡាបាល់ទាត់នៅតែសម្រុកចូលយ៉ាងគំហុក ក្នុងនោះក៏មានអ្នកឡើងផ្លោះរបងចូលរួមទស្សនាផងដែរ។

នៅពេលនេះ ចំនួនអ្នកទស្សនាត្រូវបានគេមើលឃើញថា មានសភាពតែនតាន់តាប់ ក្នុងនោះ ក៏មានតារាងចម្រៀងដ៏ល្បី២រូប មានវត្តមានបើកឆាករាំបទញីកែងជើង ដើម្បីស្វាគមន៍ការមុនពេលការប្រកួតបាល់ទាត់កម្ពុជា-ទីម័រ នឹងចាប់ផ្ដើមនៅពេលបន្តិចទៀត៕