ព្រះសីហនុៈ បុរសម្នាក់បានសន្លប់ស្តូកស្តឹង និងរងរបួសបែកមុខ បែកមាត់ រីឯសត្វគោមួយក្បាលទម្ងន់ប្រមាណជិត៤០០គីឡូក្រាមបានងាប់នៅនឹងកន្លែង បន្ទាប់ពីត្រូវបានបុរសរងគ្រោះខាងលើជិះម៉ូតូបុកពេញទំហឹងកាលពីម៉ោង០០និង១៥នាទីយអធ្រាត្រឈានចូលថ្ងៃទី០១ ខែមិថុនា ឆ្នាំ២០១៦ នៅចំណុចមុខផ្សារឃ្លាំងលើ ស្ថិតក្នុងភូមិ០១ សង្កាត់លេខ១ ក្រុងព្រះសីហនុ។

សាក្សីនៅក្បែរកន្លែងកើតហេតុបានឲ្យដឹងថា នៅមុនពេលកើតហេតុ ខណៈក្រុមគ្រួសាររបស់គាត់ចូលដំណេកបានបន្តិច ស្រាប់តែបានឮសម្លេងលាន់ខ្លាំងនៅលើផ្លូវជាតិមុខផ្សារឃ្លាំងលើ គ្រានោះគាត់គិតថា ពិតជាមានគ្រោះថ្នាក់ចរាចរណ៍ ដែលអាចបង្កឡើងរវាងម៉ូតូ និងម៉ូតូ ឬម៉ូតូជាមួយរថយន្តជាក់ជាមិនខាន ប៉ុន្តែនៅពេលគាត់ស្ទុះមកដល់កន្លែងកើតហេតុ ស្រាប់តែឃើញសត្វគោមួយក្បាលដេកងាប់នៅកណ្តាលថ្នល់ និងបុរសម្នាក់សន្លប់ស្តូកស្តឹង រួមជាមួយម៉ូតូមួយគ្រឿងនៅចម្ងាយពីគ្នាប្រមាណជាង៣០ម៉ែត្រទើបគាត់ទូរស័ព្ទហៅរថយន្តសង្គ្រោះមកដឹកបុរសរងគ្រោះទៅមន្ទីពេទ្យ។

ប្រភពដដែលបានបន្តថា ក្រោយហេតុការណ៍ប្រជាពលរដ្ឋ និងសមត្ថកិច្ចមូលដ្ឋាននគរបាលចរាណ៍បានមកដល់ ហើយសន្និដ្ឋានថា ម៉ូតូជនរងគ្រោះបើកក្នុងល្បឿនលឿន ហើយបានបុកសត្វគោទម្ងន់ជិត៤០០គីឡូក្រាមងាប់នៅនឹងកន្លែង។ ចំណែកជនរងគ្រោះមិនបានបង់ជិវិតទេ គ្រាន់តែរងរបួសបែកមុខបែកមាត់ តែប៉ុណ្ណោះ។

ក្រោយកើតហេតុទាំងសត្វគោ ទាំងម៉ូតូ ត្រូវបានសមត្ថកិច្ចចរាចរណ៍ដឹកយកទៅកាន់ការិយាល័យចរាចរណ៍ បើទោះបីជាត្រូវបានអ្នកភូមិក្បែរនោះស្នើសុំឲ្យទុកគោ ដើម្បីលក់យកលុយព្យាបាលរបួស បុរសរងគ្រោះយ៉ាងណាក្តី៕