Post News Media ព័ត៌មានជាតិ ព្រឹកនេះ ACU ...

ព្រឹកនេះ ACU បញ្ជូនមេធាវី ពេជ រតនា ទៅតុលាការ

ភ្នំពេញ: ប្រធានអង្គភាពប្រឆាំងអំពើពុករលួយ លោកទេសរដ្ឋមន្ត្រី ឱម យ៉ិនទៀង បានប្រាប់សារព័ត៌មាន Post News នៅមុននេះបន្តិចថា នៅម៉ោង៨ព្រឹក ថ្ងៃទី២ ខែមិថុនានេះ អង្គភាពប្រឆាំងអំពើពុករលួយ (ACU) នឹងបញ្ជូនលោកមេធាវី ពេជ រតនា ទៅកាន់តុលាការមុនការកំណត់។

បើតាមលោកទេសរដ្ឋមន្ត្រី ឱម យ៉ិនទៀង បានឲ្យដឹងថា គណ:មេធាវីកម្ពុជា បានត្រៀមរួចរាល់ហើយ នូវមេធាវីចំនួន៦រូប ដើម្បីការពារក្ដីឲ្យលោកមេធាវី ពេជ រតនា ដែលជាជនសង្ស័យទៅតាមផ្លូវច្បាប់។ លោកទេសរដ្ឋមន្ត្រីសង្កត់ធ្ងន់ថា “យើងជឿថា មេធាវី ជាអ្នកច្បាប់ ធ្វើអីទៅតាមផ្លូវច្បាប់ មិនធ្វើខុសអ្វីនោះឡើយ”។ ក្នុងនោះដែរ លោក ឱម យ៉ិនទៀង មិនបានបរិយាយពាក់ព័ន្ធនឹងបទចោទលើមេធាវីរូបនេះទេ ដោយលោកបង្វែឲ្យព្រះរាជអាជ្ញាជាអ្នកធ្វើការចោទប្រកាន់វិញ។

គួរជម្រាបថា លោកមេធាវី ពេជ រតនា អាយុ៤០ឆ្នាំ ត្រូវបានអង្គភាពប្រឆាំងអំពើពុករលួយ ចាប់ខ្លួននៅក្នុងពហុកីឡដ្ឋានជាតិអូឡាំពិក ទល់មុខសាលាដំបូងរាជធានីភ្នំពេញ កាលពីព្រឹកថ្ងៃទី៣១ ខែឧសភា ឆ្នាំ២០១៦ ប៉ុន្តែអង្គភាពមួយនេះ មិនបានបញ្ជាក់ពីដំណើររឿងនេះឡើយ។ “ពិតជាមានការចាប់ខ្លួនមេធាវីម្នាក់មែន នៅក្នុងស្តាតអូឡាំពិក ប៉ុន្តែយើងមិនអាចនិយាយបានទេថា ពាក់ព័ន្ធនឹងករណីអ្វី”។ លោក ឱម យ៉ិនទៀង បញ្ជាក់។

ភ្លាមៗ ក្រោយការចាប់ខ្លួនមេធាវីរូបនេះ ប្រធានគណ:មេធាវី នៃព្រះរាជាណាចក្រកម្ពុជា លោក ប៊ុន ហុន បានប្រាប់ថា គណ:មេធាវី មិនគាំទ្រអំពើខុសច្បាប់របស់មេធាវីណាម្នាក់ ដែលប្រព្រឹត្តអំពើខុសច្បាប់ឡើយ។ លោក ប៊ុន ហុន៖ “រហូតមកទល់ពេលនេះ ខ្ញុំមិនទាន់ទទួលដំណឹងថា មានការឃាត់ខ្លួនមេធាវីឈ្មោះអី ឬប្រព្រឹត្តបទល្មើសអ្វីនោះទេ ប៉ុន្តែបើពាក់ព័ន្ធនឹងអំពើអន្តរការី(អ្នករត់ការ) ខ្ញុំមិនគាំទ្រទេ ពីព្រោះវាជាអំពើខុសច្បាប់”

នៅថ្ងៃចាប់ខ្លួននោះដែរ គណ:មេធាវី បានចេញសេចក្តីណែនាំមួយឲ្យសមាជិករបស់ខ្លួនទាំងអស់ ប្រកាន់ខ្ជាប់នូវច្បាប់ស្តីពីលក្ខន្តិក:មេធាវី ក្រមសីលធម៌មេធាវី បទបញ្ជាផ្ទៃក្នុងនៃគណ:មេធាវី ព្រមទាំងច្បាប់ និងបទប្បញត្តិជាធរមាន។

បើតាមលោក ប៊ុន ហុន៖ គណ:មេធាវី ធ្លាប់បានធ្វើការរឹតបន្តឹងជារើយៗ ដោយឲ្យមេធាវីគោរពនូវក្រមសីលធម៌ វិជ្ជាជីវ: ទៅតាមផ្លូវច្បាប់ និងរដ្ឋធម្មនុញ្ញ ហើយថ្មីៗនេះ គណ:មេធាវី បានធ្វើការណែនាំដល់សមាជិករបស់ខ្លួនជីត១០០០នាក់។ លោក ប៊ុន ហុន បន្ថែមថា ចាប់តាំងពីបង្កើតគណ:មេធាវី នៅឆ្នាំ១៩៩៥ រហូតដល់ទល់នឹងឆ្នាំ២០១៦នេះ មិនទាន់មានមេធាវីណាម្នាក់ ពាក់ព័ន្ធនឹងបទល្មើសអំពើពុករលួយនៅឡើយទេ។ លោកនិយាយថា ប្រសិនបើកូនក្ដីជួលមេធាវីរកយុត្តិធម៌អ្វីមួយ ដោយផ្ដល់ប្រាក់ឈ្នួលឲ្យមេធាវីនោះ មិនមែនជារឿងអំពើពុករលួយឡើយ លើកលែងតែមេធាវីនោះ ជាអ្នករត់ការពីកូនក្ដីទៅកាន់សមត្ថកិច្ចណាមួយ៕

ee333


13335972_1609395742708124_7028361748997924118_n

13346503_1609396469374718_8629192093667927680_n

១

២

៣

Loading...