ចិន: អាជ្ញាធរមូលដ្ឋានបានឱ្យដឹងនៅថ្ងៃអង្គារ៍នេះថា លេចធ្លាយសារធាតុគីមីនៅរោងចក្រគីមីមួយកន្លែង នៅក្នុងខេត្ត Shandong ភាគខាងកើតរបស់ប្រទេសចិន បានបណ្តាលឲ្យមនុស្សចំនួន ១៣១នាក់ កំពុងត្រូវបានបញ្ជូនទៅកាន់មន្ទីរពេទ្យដើម្បីធ្វើការព្យាបាល។ នេះបើយោងតាមការចេញផ្សាយដោយទីភ្នាក់ងារសារព័ត៌មានចិនស៊ិនហួ នៅថ្ងៃទី២៨ មិថុនា ឆ្នាំ២០១៦នេះ។

ការលេចធ្លាយសារធាតុគីមីចំនួន ៣០គីឡូក្រាម នៅថ្ងៃទី២១ ខែមិថុនា នៅវេលាម៉ោង ៦រសៀល ពីក្រុមហ៊ុនបច្ចេកវិទ្យា Beichen Biotechnology Co., Ltd នៅតំបន់ Shenxian។ អ្នកស្រុកចំនួន ១៣១នាក់ រួមទាំងកុមារចំនួន ៤៣នាក់ ត្រូវបានគេបញ្ជូនទៅមន្ទីរពេទ្យ​ផងដែេរ​។

បើយោងតាមរដ្ឋាភិបាលតំបន់នោះ មានមនុស្ស ១១នាក់ បានទៅពិនិត្យសុខភាពរួចហើយកាលពីព្រឹកថ្ងៃអង្គារ៍នេះ ហើយពួកគេទាំងនោះមិនមាន​អ្វីប៉ះ​ពាល់​ដល់​សុខភាពនោះទេ។

ការស៊ើបអង្កេតបឋមបានបង្ហាញថា ការលេចធ្លាយនេះត្រូវបានបង្កឡើងដោយការធ្វេសប្រហែស។ មន្ត្រីការិយាល័យបរិស្ថានស្រុកបានថ្លែងថា ក្រុមហ៊ុននេះត្រូវបានគេបញ្ជាឱ្យបិទជាអចិន្ត្រៃផងដែរ៕