(ភ្នំពេញ) ៖ មន្រ្តីនគរបាលចរាចរណ៍មួយចំនួន ត្រូវបានស្នងការនគរបាលរាជធានីភ្នំពេញ លោក ជូន សុវណ្ណ ព្រមាននិងស្តីបន្តោស ក្រោយពីមានការរិះគន់ពីប្រជាពលរដ្ឋ ដែលយកលុយក្រៅប្រព័ន្ធច្បាប់ ។
លោក ជូន សុវណ្ណ បានលើកឡើងថា នគរបាលចរាចរណ៍មួយចំនួនអាចនឹងមានការឲ្យឈរជើង ឬបណ្ដេញចេញពីជួរកងកម្លាំងគរបាល ប្រសិនបើនគរបាលចរាចរណ៍នោះ ប្រើអំណាចរបស់ខ្លួន ហៅអ្នកធ្វើដំណើរខុសច្បាប់ មកគំរាមទារប្រាក់ក្រៅកំរ៉ៃសេវាខុសច្បាប់ និងមិនចេញវិក្កយបត្រផាកពិន័យទៅឲ្យអ្នកធ្វើដំណើរខុសច្បាប់ទាំងនោះ។
នៅក្នុងឱកាសបូកសរុបការងារថែរក្សាការពារសន្តិសុខ សណ្ដាប់ធ្នាប់រយ:ពេល៤ថ្ងៃនៃថ្ងៃបុណ្យចូលឆ្នាំថ្មីប្រពៃណីខ្មែរ នាព្រឹកថ្ងៃទី១៨ មេសាម្សិលមុិញ នេះ នៅស្នងការដ្ឋាននគរបាលរាជធានីភ្នំពេញ នាយឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានថ្លែងទៀតថា ចាប់ពីពេលនេះ ទៅសម្រាប់ស្នងការនគរបាលរាជធានីភ្នំពេញ នឹងដាក់ពង្រាយកងតម្រួតបទបញ្ជាបន្ថែមទៀត ពិសេសដាក់នៅតាមផ្លូវខ្វែង ដើម្បីត្រួតពិនិត្យទៅលើសកម្មភាពរបស់កងកម្លាំងនគរបាលចរាចរណ៍ទាំងនោះ ដែលបានធ្វើសកម្មភាពជាច្រើន ដូចជា ការមិនគោរពច្បាប់ មិនគោរពបទបញ្ជា មិនគោរពវិន័យនគរបាលធ្វើឲ្យកិត្តិយសរបស់នគរបាលទាំងមូលមានការធ្លាក់ចុះ និងធ្វើឲ្យមានការអាក់អន់ចិត្តពីសំណាក់ប្រជាពលរដ្ឋ។
ភាពកំហុសខុសឆ្គងមួយចំនួនរបស់កងកម្លាំងនគរបាលចរាចរណ៍ដែលប្រចាំការនៅតាមដងផ្លូវមួយ ចំនួនត្រូវបានគេឃើញមានដូចជា កងកម្លាំងនគរបាលចរាចរណ៍ខ្លះមានឯកសណ្ឋានការស្លៀកពាក់មិនបានត្រឹមត្រូវ នគរបាលខ្លះជិះម៉ូតូគ្មានស្លាកលេខ គ្មានកញ្ចក់ គ្មានពាក់មួកសុវត្ថិភាព ខ្លះនិយាយបំភ្លើសប្រាសចាកពីច្បាប់ និងមានការគំរាមទារប្រាក់ក្រៅកំរ៉ៃសេវា ដោយមិនចេញ វិក្កយបត្រផាកពិន័យជាដើម ។
មតិយោបល់