តួកគីៈវិសុទ្ធកម្មរបស់តួកគីចំពោះអ្នកគាំទ្របព្វជិត Gulen កាលពីថ្ងៃសៅរ៍នេះ​បានបន្តបិទសាលាឯកជន មូលនិធិជំនួយសប្បុរស និងស្ថាប័នជនរាប់រយកន្លែង​ដែលសង្ស័យ​ជាប់ពាក់ព័ន្ធជាមួយ​​បព្វជិតមូស្លីម​មានមូលដ្ឋាន​នៅសហរដ្ឋអាមេរិក លោក Fethullah Gulen ដែលជាអតីត​សម្ព័ន្ធមិត្តរបស់​លោកប្រធានាធិបតី Erdogan ដែលបានប្រែក្លាយទៅជា​គូប្រជែង​យ៉ាងខ្លាំងរបស់គាត់។នេះបើយោងតាមសារព័ត៌មានស៊ីហួចុះផ្សាយនៅថ្ងៃទី២៤ ខែកក្កដានេះ។

រដ្ឋាភិបាលទីក្រុងអង់ការ៉ាក៏បានប្រកាសអាសន្នបន្ទាប់ពីរដ្ឋប្រហារយោធាមួយបរាជ័យ។
ទីភ្នាក់ងារព័ត៌មានរបស់រដ្ឋ Anadolu បានរាយការណ៍កាលពីថ្ងៃសៅរ៍ថា នេះគឺជាអនុក្រឹត្យ​ដែលចេញដោយ​ប្រធានាធិបតី លោក Recep Tayyip Erdogan លើកដំបូង ​ចាប់តាំងពីរដ្ឋស្ថិត​នៅក្នុងភាពអាសន្ដដែលត្រូវបានប្រកាសកាលពីថ្ងៃពុធ។

លោកបានបញ្ជាឱ្យបិទសាលាឯកជន១.០៤៣កន្លែង មូលនិធិសប្បុរស និងសហព័ន្ធ១.២២៩កន្លែង សហជីពពាណិជ្ជកម្ម ១៩កន្លែង សាកលវិទ្យាល័យ ១៥កន្លែង និង ស្ថាប័នវេជ្ជសាស្រ្តចំនួន ៣៥កន្លែង៕