ឥណ្ឌា: អ្នកដំណើរនិងសមាជិកនាវិកទាំងអស់ចំនួន ២៧៥នាក់ ដែលជិះនៅលើ​យន្ត​​​ហោះ​ក្រុមហ៊ុនអាកាសចរណ៍ Emirates Airline បានធ្លាក់ពេលចុះចតនៅព្រលាន​យន្តហោះ​អន្តរជាតិទីក្រុងឌូបៃ ហើយមនុស្សទាំងអស់ក៏ត្រូវបានជម្លៀសចេញដោយសុវត្ថិភាពផងដែរ។ នេះបើយោងតាមការចេញផ្សាយដោយសារព័ត៌មានចិនស៊ិនហួ នៅថ្ងៃទី០៣ សីហា ឆ្នាំ២០១៦នេះ។

ក្រុមហ៊ុន Emirates បានឱ្យដឹងថានៅលើគណនី Twitter របស់ខ្លួនថា យន្តហោះដែលហោះហើរពី​ទី​ក្រុង Thiruvananthapuram ប្រទេសឥណ្ឌា ទៅកាន់ទីក្រុងឌូបៃ បានជួបនៅក្នុងឧប្បត្តិហេតុមួយ នៅឯ​ព្រលានយន្តហោះទីក្រុងឌូបៃ នៅម៉ោង១២និង៤៥នាទី ម៉ោងក្នុងស្រុក។

ការិយាល័យប្រព័ន្ធផ្សព្វផ្សាយដែលគ្រប់គ្រងដោយរដ្ឋាភិបាលទីក្រុងឌូបៃ បានឱ្យដឹងថា ការហោះហើរ​ទាំង​អស់​ពីក្រុងឌូបៃ ត្រូវបានគេបានពន្យារពេលរហូតដល់មានការជូនដំណឹងបន្ថែមទៀត ដោយសារយន្តហោះ​ធ្លាក់​ផ្ទុះឆេះផ្សែងខ្មៅ នៅពេលដែលចុះចត។ ហោះហើរមួយចំនួនបានចូលមក​ដល់ព្រលានយន្តហោះ​អន្តរជាតិ​ក្រុងឌូបៃ ត្រូវបានបង្វែរទៅមជ្ឈមណ្ឌលទីពីររបស់ព្រលានយន្តហោះអន្តរជាតិ Al Maktoum។

កាលពីមុន ឧប្បត្តិហេតុនៅព្រលានយន្តហោះទីក្រុងឌូបៃ រួមបញ្ចូលទាំង ការធ្លាក់យន្តហោះមួយគ្រឿង​ភ្លាមៗ ប្រភេទយន្តហោះដឹកទំនិញ UPS នៅថ្ងៃទី០៣ ខែកញ្ញា ឆ្នាំ២០១០ បន្ទាប់ពីហោះហើរចេញពី​ក្រុង​ឌូបៃ ដែលបានសម្លាប់មនុស្សពីរនាក់នៅលើយន្តហោះនេះ។

ដោយឡែក ឧប្បត្តិហេតុមួយផ្សេងទៀត កាលពីថ្ងៃទី១២ ខែមីនា ឆ្នាំ២០០៧ ពាក់ព័ន្ធនឹងយន្តហោះរបស់​ក្រុមហ៊ុន​អា​កាស​ចរណ៍បង់ក្លាដែស Biman ដែលហៀបចេញដំណើរដូចគ្នា បណ្តាលឲ្យរងរបួសអ្នក​ដំណើរ ១៤នាក់ ដូច្នេះព្រលានយន្តហោះនេះ ត្រូវបានបិទអស់រយៈពេលប្រាំបីម៉ោងឯណោះ៕