ឥណ្ឌា: ឥណ្ឌាមន្ត្រីបាននិយាយថា យ៉ាងហោចណាស់ មានមនុស្សចំនួន ៤នាក់បានស្លាប់និងរងរបួស ៩នាក់ផ្សេងទៀត នៅថ្ងៃសៅរ៍នេះ ដោយសារតែរអិលបាក់ដី ដែលបង្កឡើងដោយភ្លៀងធ្លាក់ខ្លាំងនៅតំបន់កាស្មៀរ ដែលគ្រប់គ្រងដោយប្រទេសឥណ្ឌា។ នេះបើយោងតាមការចេញផ្សាយដោយសារព័ត៌មានចិនស៊ិនហួ នៅថ្ងៃទី០៦ សីហា ឆ្នាំ២០១៦នេះ។
ការរអិលបាក់ដីនេះបានកើតឡើងនៅជិតក្នុងស្រុក Reasi Katra ចម្ងាយប្រហែល ៣១៧គីឡូម៉ែត្រភាគខាងត្បូងនៃទីក្រុងស្រីណាហ្គារដ្ឋធានីរដូវក្តៅនៃតំបន់កាស្មៀរដែលត្រួតត្រាដោយឥណ្ឌា។ អ្នកស្លាប់បីនាក់ត្រូវបានគេកំណត់ថា ជាអ្នកធ្វើធម្មយាត្រា ខណ:ពេលដែលពួកគេទៅគោរពទីសក្ការ:បូជានៅលើភ្នំ Trikuta នៃទីក្រុង Katra។ ហើយអ្នកកាន់សាសនាហិណ្ឌូរាប់លាននាក់ ទៅទស្សនានៅទីសក្ការ:បូជានេះ ជារៀងរាល់ឆ្នាំ។
មន្ត្រីមួយរូបបានឱ្យដឹងថា «នៅក្នុងការរអិលបាក់ដីដែលបានបង្កឱ្យមាននៅថ្ងៃនេះ មនុស្សបួននាក់បានស្លាប់និងប្រាំបួននាក់ទៀតរងរបួស។ អ្នករងរបួសត្រូវបញ្ជូនទៅមន្ទីរពេទ្យភ្លាមៗ បន្ទាប់ពីការផ្តល់ជំនួយលើកទីមួយនោះ ប៉ុន្តែស្ថានភាពមនុស្សប្រាំនាក់រងរបួស ត្រូវបានគេរាយការណ៍ថា មានស្ថានភាពធ្ងន់ធ្ងរ»។
សូមបញ្ជាក់ថា តំបន់កាស្មៀរដែលគ្រប់គ្រងដោយឥណ្ឌាមានដីរឹងមាំនិងមានដីរដិបរដុប។ ការរអិលបាក់ដីជាញឹកញាប់ បានកើតមានឡើងនៅក្នុងអំឡុងពេលមានភ្លៀងធ្លាក់ញឹកញាប់ ដោយសារតែតំបន់នោះសំបូរទៅដោយភ្នំជាច្រើន៕
មតិយោបល់