អ៊ីរ៉ាក់: ក្រសួងសុខាភិបាលអ៊ីរ៉ាក់បានឲ្យដឹងថា យ៉ាងហោចណាស់ មានទារកដែល​ទើប​នឹងកើតចំនួន ១២នាក់បានស្លាប់ក្នុងអគិ្គភ័យ នៅឯមន្ទីរពេទ្យសម្ភពមួយកន្លែង នៅក្នុង​ទីក្រុងបាដាដ ប្រទេស​អ៊ីរ៉ាក់។ នេះបើយោងតាម​ការចេញផ្សាយដោយសារព័ត៌មានរ៉យទ័រ នៅថ្ងៃទី១០ សីហា ឆ្នាំ២០១៦នេះ។

លោក Ahmed al-Rdainy អ្នកនាំពាក្យក្រសួងក្រសួងសុខាភិបាលអ៊ីរ៉ាក់បានថ្លែងថា ទារកទាំងនេះ​បាន​ស្ថិត​នៅ​ក្នុងមន្ទីរពេទ្យសម្ភព Yarmouk មុននិងស្លាប់ដោយថប់ដង្ហើម។ ប៉ុន្តែបើតាមរបាយការណ៍បឋម​ដែល​ផ្តល់ដោយជនស៊ីវិលបានបង្ហាញថា អគ្គិភ័យនេះបានបង្កឡើងដោយទុស្សេខ្សែភ្លើង។

អ្នកនាំពាក្យរូបនេះបានបញ្ជាក់ថា ស្ត្រីចំនួន ២៩នាក់ ដែលបានសម្រាលកូននៅមន្ទីរពេទ្យនេះ​នៅយប់ថ្ងៃអង្គារ ហើយពួកគេត្រូវបានបញ្ជូនទៅកាន់មន្ទីរពេទ្យផ្សេងទៀត នៅក្នុងទីក្រុងបាដាដ៕