ជប៉ុន: ព្យុះកំណាចទីហ្វុង នឹងធ្វើការវាយប្រហារដោយផ្ទាល់ទៅលើទីក្រុងតូក្យូ នៅថ្ងៃច័ន្ទនេះហើយ គ្រាដែលជើងហោះហើរប្រមាណ ៤០០ជើង នឹងធ្វើការចុះចតជាបន្ទាន់ មុននឹងព្យុះនេះមកដល់ប្រទេសជប៉ុន ដោយសារតែភ្លៀងធ្លាក់និងខ្យល់បក់ខ្លាំងពេក។ នេះបើយោងតាមការចេញផ្សាយដោយសារព័ត៌មាន Channel News Asia នៅថ្ងៃទី២២ សីហា ឆ្នាំ២០១៦។
ទីភ្នាក់ងារឧតុនិយមជប៉ុនបាននិយាយថា ព្យុះកំណាចទីហ្វុង Mindulle ត្រូវបានគេរំពឹងទុកថា នឹងបង្កឲ្យបាក់ដីនៅពេលថ្ងៃត្រង់នេះ បន្ទាប់មកព្យុះនេះ វានឹងធ្វើដំណើរចេញពីទីក្រុងរបស់ប្រទេសជប៉ុន ទៅកាន់ភាគខាងជើងនៅតំបន់ Tohoku។
ភ្នាក់ងារដដែលនេះ បាននិយាយថា ព្យុះកំណាចនេះមានសន្ទុះរហូតដល់ទៅ ១៨០គីឡូម៉ែត្រក្នុងមួយម៉ោង ហើយព្យុះនេះ នឹងធ្វើដំណើរទៅភាគខាងជើងក្នុងល្បឿន ២៥គីឡូម៉ែត្រក្នុងមួយម៉ោង ចាប់ពីកោះ Miyake នៅពេលព្រឹកព្រលឹម។ មិនមានរបាយការណ៍ពីការខូចខាតឬមនុស្សស្លាប់នៅឡើយទេ នៅលើកោះ Miyake អ្នកស្រុករស់នៅទីនោះប្រហែល ២.៦០០នាក់ ដែលត្រូវបានគេស្គាល់ថា ជាអ្នកនេសាទ ទេសចរណ៍និងកសិករផងដែរ។
ទូរទស្សន៍ជាតិ NHK បាននិយាយថា ព្យុះកំណាចនេះ បណ្តាលឱ្យក្រុមហ៊ុនអាកាសចរណ៍នៅទូទាំងប្រទេស លុបជើងហោះហើរសរុបចំនួន ៣៨៧ជើង ហើយភាគច្រើនមកពីព្រលានយន្តហោះ Haneda នៅទីក្រុងតូក្យូ។
ក្រុមហ៊ុនអាកាសចរណ៍ជប៉ុនបាននិយាយថា ខ្លួនបានលុបចោលហោះហើរក្នុងស្រុក ១៤៥ជើង ពាក់កណ្តាលថ្ងៃរសៀលនេះ ដែលបង្កឱ្យប៉ះពាល់ដល់អតិថិជន ២៦.៩១០នាក់ ខណ:ពេលដែលក្រុមហ៊ុនអាកាសចរណ៍ All Nippon Airways បានលុបចោលជើងហោះហើរក្នុងស្រុក ៩៦ជើង ដែលប៉ះពាល់ដល់អ្នកដំណើរ ២១.៣០០នាក់។
សូមជម្រាបថា បើយោងតាមក្រុមហ៊ុនផ្លូវដែកជប៉ុន East Japan Railway ដែលជាប្រតិបត្តិករផ្លូវដែកធំជាងគេបំផុតនៅក្នុងតំបន់នោះ បានឲ្យដឹងថា សេវារថភ្លើងដ៏សំខាន់នៅទីក្រុងតូក្យូនិងជុំវិញតំបន់នោះ ប្រតិបត្តិការជាធម្មតា ក្នុងអំឡុងពេលព្រឹកម៉ោងធ្វើដំណើរ រួមទាំងរថភ្លើងល្បឿនលឿន៕
មតិយោបល់