ភ្នំពេញ: ស្ថានឯកអគ្គរាជទូតកម្ពុជា ប្រចាំប្រទេសម៉ាឡេស៊ី បានអន្តរាគមន៍ជួយពលករ-ពលការិនីខ្មែរ ចំនួន២នាក់ ឲ្យបានត្រឡប់មកកម្ពុជា វិញ បន្ទាប់ពីពួកគេមិនអាចទ្រាំទ្រនឹងស្ថានភាពលំបាករបស់កាងារ ទើបសម្រេចសុំការអន្តរាគមន៍ពីអាជ្ញាធរកម្ពុជា នៅក្រៅប្រទេស។

អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក ជុំ សុន្ទរី ឲ្យដឹងនៅព្រឹកថ្ងៃទី១០ ខែតុលានេះថា ពលករឈ្មោះ ន.ម អាយុ៣៤ឆ្នាំ មានស្រុកកំណើតនៅខេត្តស្ទឹងត្រែង បានធ្វើដំណើរតាមរថយន្តតាមប្រទេសថៃ ទៅម៉ាឡេស៊ី កាលពីខែឧសភា ឆ្នាំ២០១៦ និងធ្វើការជាអ្នកឈូសឈើ។ ដោយសារការងារលំបាកពេក ពលករបានទៅស្ថានទូត នៅថ្ងៃទី១៩ ខែកញ្ញា ឆ្នាំ២០១៦ ស្នើជួយឲ្យបានត្រឡប់មកកម្ពុជាវិញ។ អង្គការសម្ព័ន្ធចាប់ដៃ បានទិញសំបុត្រយន្តហោះ ហើយស្ថានទូតបានចេញថ្លៃបង់ពិន័យឲ្យការិយាល័យអន្តោប្រវេសន៍ម៉ាឡេស៊ី។

ដោយឡែក ពលការិនីឈ្មោះ ម.ស.ជ អាយុ៣៧ឆ្នាំ មានស្រុកកំណើតនៅខេត្តកណ្តាល បានទៅធ្វើការនៅប្រទេសម៉ាឡេស៊ី ដោយខ្លួនឯងជាលើកទី២ កាលពីខែ មករា ឆ្នាំ២០១៥ នៅហាង Spa មួយកន្លែង។ ដោយសារការងារលំបាកពេក នាងបានទៅស្ថានទូត នៅថ្ងៃទី ២៨ ខែកញ្ញា ឆ្នាំ២០១៦ ស្នើសុំជួយទាមទារប្រាក់ខែដែលនៅសល់ និងជួយឲ្យបានត្រឡប់មកកម្ពុជាវិញ។ ក្រោមកិច្ចអន្តរាគមន៍របស់ស្ថានទូត នៅថ្ងៃទី២៩ ខែកញ្ញា ឆ្នាំ២០១៦ ថៅកែរបស់ពលការិនី បានយល់ព្រមប្រគល់ប្រាក់ខែដែលនៅសល់ឲ្យនាងគ្រប់ចំនួន។

ពលករ-ពលការិនីទាំងពីរនាក់ បានមកដល់ព្រលានយន្តអន្តរជាតិភ្នំពេញ នៅថ្ងៃទី៨ ខែតុលា ឆ្នាំ២០១៦ វេលាម៉ោង៧៖៣៥នាទីព្រឹក តាមជើងយន្តហោះលេខ AK-536។ ក្នុងអំឡុងពេលរង់ចាំត្រឡប់មកកម្ពុជាវិញ ស្ថានទូតបានផ្តល់កន្លែងស្នាក់នៅ និងអាហារបរិភោគដល់អ្នកទាំងពីរផងដែរ៕