អាមេរិកៈ ក្រុមហ៊ុន Nokia បានបញ្ជាក់យ៉ាងច្បាស់ថា នៅចុងឆ្នាំនេះ ខ្លួននឹងចាប់ផ្ដើមប្រឡូកនៅក្នុង​ទីផ្សារស្មាតហ្វូនឡើងវិញ បន្ទាប់ពីកិច្ចព្រមព្រៀងជាមួយក្រុមហ៊ុន Microsoft ត្រូវបាន​ផុតកំណត់។ នៅថ្ងៃនេះ ក៏មានដំណឹងថ្មីទាក់ទងនឹង Nokia ផងដែរ។

យោងតាមការចេញផ្សាយរបស់សារព័ត៌មាន Phone Arena បានឲ្យដឹងថា ស្មាតហ្វូនថ្មីរបស់ Nokia គឺ​មានឈ្មោះ D1C ដែលមានអេក្រង់ Full HD និងបំពាក់ដោយកាមេរ៉ាទំហំ ១៣មេហ្គាភិចសែល និង​កាមេរ៉ាមុខ ៨មេហ្គាភិចសែល ជាពិសេសគឺមានមេម៉ូរីទំហំ 32GB។

បន្ថែមពីលើនេះ D1C មានអង្គប្រតិបត្តិប្រភេទ Snapdragon 430 SoC និងមាន RAM ទំហំ 3GB ព្រមទាំងប្រើប្រាស់ប្រព័ន្ធដំណើរការ Android 7.0 Nougat ប៉ុន្តែកាលបរិច្ឆេទនៃការបង្ហាញ​ខ្លួន​នោះ នៅមិនទាន់ដឹងច្បាស់ទេ។

គួរបញ្ជាក់ផងដែរថា ក្រុមហ៊ុន Nokia បានលក់អាជីវកម្មទូរស័ព្ទចល័តទៅឲ្យក្រុមហ៊ុន Microsoft ក្នុង​តម្លៃ ៧.២ពាន់លានដុល្លារអាមេរិក ក្នុងនោះមានកិច្ចព្រមព្រៀងមួយ ដែលបានបញ្ជាក់ថា ចាប់ពីថ្ងៃ​ចុះ​ហត្ថាលេខារហូតដល់ចុងឆ្នាំ ២០១៦ ទើប Nokia មានសិទ្ធិផលិតស្មាតហ្វូនថ្មី ដែលប្រើស្លាកសញ្ញា Nokia បាន៕