ភ្នំពេញៈ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្ដេចក្រឡាហោម ស ខេង បានលើកសរសើរដល់រដ្ឋមន្ត្រីក្រសួងបរិស្ថាន នៅនឹងមុខ ខណៈដែលលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រម៉ាញ់ និងនេសាទ ត្រូវបានបន្ទោសបង្អាប់ រឿងអវត្តមានក្នុងកិច្ចប្រជុំផ្សព្វផ្សាយមួយ ដោយថា ហេតុផលអវត្តមានមិនមកប្រជុំ មិនសមស្រប និងមិនគ្រប់គ្រាន់។ យ៉ាងណា លោក វេង សាខុន និយាយថា លោកបានណែនាំឲ្យរដ្ឋលេខាធិការពីររូប ចូលរួមក្នុងកិច្ចប្រជុំនេះ តំណាងឲ្យក្រសួងកសិកម្ម ហើយលោកក៏ទទួលយកកំហុស និងការណែនាំរបស់ថ្នាក់ដឹកនាំផងដែរ។

ថ្លែងក្នុងកិច្ចប្រជុំផ្សព្វផ្សាយសារាចរណែនាំរបស់រដ្ឋាភិបាល ស្ដីពីវិធានការចាំបាច់នានាក្នុងការពង្រឹង ការគ្រប់គ្រងធនធានធម្មជាតិ នៅក្រសួងមហាផ្ទៃ កាលពីថ្ងៃទី១០ ខែតុលា សម្ដេច ស ខេង បានបន្ទោសថា កិច្ចប្រជុំនេះ គឺមានក្រសួងតួអង្គចំនួនពីរ ដែលជាក្រសួងស្នួល រួមមានក្រសួងបរិស្ថាន និងក្រសួងកសិកម្ម ប៉ុន្តែរដ្ឋមន្ត្រីក្រសួងកសិកម្ម លោក វេង សាខុន បានអវត្តមាន មិនចូលរួមកិច្ចប្រជុំ ហើយថា មូលហេតុនៃការអវត្តមានក្នុងអង្គប្រជុំដ៏សំខាន់នេះ មិនសមស្រប មិនអាចទទួលយកបាន និងគ្មានការទទួលខុសត្រូវ។

សម្ដេចក្រឡាហោម ស ខេង ថ្លែងយ៉ាងដូច្នេះ «ថ្ងៃនេះ ក្រសួងតួអង្គមានពីរ ក្រសួងដែលស្នួលមានពីរ គឺក្រសួងកសិកម្ម និងក្រសួងបរិស្ថាន។ ប៉ុន្តែក្រសួងបរិស្ថាន រដ្ឋមន្ត្រីចូលរួម ក្រសួងកសិកម្ម រដ្ឋមន្ត្រីមិនបានចូលរួម……! មូលហេតុហ្នឹងវាមិនស្រប វាមិនៗ វាមិនសមហេតុផល មូលហេតុវាមិនដល់កម្រិត បើនាយករដ្ឋមន្ត្រី លោកហៅ កោះទៅប្រជុំរឿងមួយផ្សេង ប៉ុននេះទទួលភ្ញៀវ បើទទួលភ្ញៀវមិនមែនថ្នាក់រដ្ឋមន្ត្រីស្មើរទៀត ថ្នាក់ក្រោមទៀត»។

សម្ដេចក្រឡាហោម ក៏បានណែនាំឲ្យលោក វេង សាខុន ត្រូវចេះបែងចែកការងារឲ្យបានច្បាស់លាស់រវាងការងារស្នួល និងបន្ទាន់ ហើយត្រូវចេះផ្ដល់អាទិភាពដល់ការងារណាសំខាន់ និងការងារណាដែលត្រូវធ្វើបន្ទាន់។ សម្ដេច ស ខេង ៖ «យើងត្រូវផ្ដល់អាទិភាពអាការងារណាដែលវាសំខាន់ ការងារណាបន្ទាន់ ដើម្បីផ្ដល់ឱកាស បើមិនអញ្ចឹងយើងរវល់ទៅនេះទៅណោះតិចតួច យើងបោះបង់ចោលការងារស្នួលរបស់យើង វាមិនត្រូវ ខ្ញុំគិតថា វាមិនត្រូវ»។

យ៉ាងណា លោក វេង សាខុន បដិសេធមិនបានដឹងចំពោះការលើកពេលនៃកិច្ចប្រជុំខាងលើ ប៉ុន្តែលោកថា បានអនុញ្ញាតឲ្យរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ពីររូប មានលោក ណៅ ធួក និងលោក ហាស់ សារ៉េត ទៅចូលរួមតំណាងរបស់ក្រសួង។ លោបន្តថា លោកទទួលយកកំហុស និងការណែនាំរបស់ថ្នាក់ដឹកនាំ។

លោក វេង សាខុន ថ្លែងប្រាប់ Post News តាមទូរស័ព្ទនៅរសៀលថ្ងៃនេះថា «ក្រសួងមហាផ្ទៃ ធ្វើលិខិតអញ្ជើញថ្នាក់ដឹកនាំក្រសួងចូលរួមប្រជុំថ្ងៃ៧ ខែតុលា ប៉ុន្តែថ្ងៃទី៧ ខែតុលានេះ ចំពេលដែលខ្ញុំបានការអនុញ្ញាតពីសម្ដេចតេជោ ទៅប្រជុំថ្នាក់រដ្ឋមន្ត្រីអាស៊ានកសិកម្ម លើកទី៤៨ ពីថ្ងៃទី៥ ដល់ថ្ងៃទី៨ នៅសាំងហ្គាពួរ! ចឹងខ្ញុំមិនអាចចូលរួមបានទេ ប៉ុន្តែចៃដន្យអីខ្ញុំមកដល់វិញថ្ងៃ៩ ខ្ញុំអត់បានដឹងអីទាំងអស់គេដូរអីយ៉ាងម៉េចអីម៉េច!…… យប់ទៅហើយខ្ញុំឮថា អត់បានប្រជុំទេ គេប្ដូរថ្ងៃ១០វិញ ចឹងខ្ញុំក៏គ្មានឯកសារណារៀបចំទាន់ដែរ ហើយខ្ញុំដឹងថា ថ្ងៃ១០នេះ ខ្ញុំរវល់ ចឹងទៅខ្ញុំក៏បានចាររួចហើយដែរ ឲ្យរដ្ឋលេខាធិការពីររូប ឯកឧត្តម ណៅ ធួក និងឯកឧត្តម ហាស់ សារ៉េត ដឹកនាំអង្គភាពពាក់ព័ន្ធ ជាពិសេសរដ្ឋបាលព្រៃឈើ និងរដ្ឋបាលជលផលទៅចូលរួមតែម្ដងទៅ»។ លោកបន្តថា «មិនអីទេ! កំហុសទាំងអស់ទុកឲ្យខ្ញុំចុះ ខ្ញុំទទួលទាំងស្រុងហ្មង អត់មានបញ្ហាអីទេខ្ញុំនោះ»។

ទោះបីជាយ៉ាងណាក្ដី ក្នុងកិច្ចប្រជុំផ្សព្វផ្សាយពីសារាចរណែនាំរបស់រដ្ឋាភិបាលនេះ សម្ដេចក្រឡាហោម ស ខេង ក៏បានសរសើរដល់រដ្ឋមន្ត្រីក្រសួងបរិស្ថាន លោក សាយ សំអាល់ ដែលជាក្រសួងសាម៉ី មាននាទីស្នួលក្នុងការគាំពារ បង្ក្រាប និងទប់ស្កាត់បទល្មើសព្រៃឈើដោយផ្ទាល់ ដោយសហការជាមួយអង្គភាពពាក់ព័ន្ធនានា ដែលថ្មីៗនេះ មានស្នាដៃក្នុងការបង្ក្រាប គាំពារបរិស្ថាន ជាពិសេសកំណែទម្រង់នៅក្នុងក្រសួង៕