ភ្នំពេញៈ អភិបាលរងរាជធានីភ្នំពេញ លោក ឃួង ស្រេង អភិបាល នៅព្រឹកថ្ងៃទី១១ ខែតុលានេះ បានស្តីបន្ទោសដល់អាជ្ញាធរថ្នាក់មូលដ្ឋាននិងមន្ត្រីនៃមន្ទីរសាធារណការនិងដឹកជញ្ជូនរាជធានីភ្នំពេញ ចំពោះការមិនឆ្លើយតបតាមសំណើរបស់ប្រជាពលរដ្ឋសុំឲ្យកាត់ដើមឈើ ដែលនឹងរលំសង្កត់លើលំនៅឋានរបស់ប្រជាពលរដ្ឋ និងអាចរលំលើខ្សែភ្លើងអគ្គិសនី ដែលនឹងបង្កឲ្យមានគ្រោះថ្នាក់ជាយថាហេតុ។

ក្នុងវេទិកាសាធារណៈនៅក្នុងខណ្ឌ៧មករា លោក ឃួង ស្រេង បានថ្លែងថា អាជ្ញាធរមូលដ្ឋាន និងជំនាញពាក់ព័ន្ធត្រូវសហការគ្នាដោះស្រាយបញ្ហាដែលជាកង្វល់របស់ប្រជាពលរដ្ឋ។ លោកអភិបាលរងបានបញ្ជាក់ថា« អាជ្ញាធរសង្កាត់ ខណ្ឌ និងមន្ទីរជំនាញទាំងអស់ ត្រូវសហការគ្នាឲ្យបានល្អ ដើម្បីធ្វើការបម្រើប្រជាពលរដ្ឋ ហើយត្រូវដឹងសុខទុក្ខរបស់ប្រជាពលដ្ឋ ហើយកុំឆ្លើយដាក់គ្នាពីការងារ ដែលធ្វើដោះស្រាយជូនពួកគាត់។ តើទុកឲ្យដើមឈើរលំបាក់សង្កត់លើប្រជាពលរដ្ឋស្លាប់ឬយ៉ាងណា? មួយវិញទៀត បើដើមឈើនោះបាក់មកលើបង្គោលភ្លើងអគ្គិសនី ដាច់ខ្សែភ្លើង វាក៏នឹងធ្វើឲ្យឆក់ស្លាប់ប្រជាពលរដ្ឋ។ ដូច្នេះការងារនេះ មិនចាំបាច់ធ្វើសំណើមកថ្នាក់លើទេ គឺត្រូវដោះស្រាយនៅនឹងកន្លែង ហើយមន្ទីរកុំថ្ងូរ ខណ្ឌកុំស្រែក។ បើអត់លុយ គឺខ្ញុំជាអ្នកចេញ»។ លោក ឃួង ស្រេង បន្តថា អាជ្ញាធរ ត្រូវបម្រើពលរដ្ឋដោយភាពឈ្លាសវៃ និងដោយការយកចិត្តទុកដាក់។

ប្រជាពលរដ្ឋក្នុងខណ្ឌ៧មករា ក៏ដូចជាក្នុងខណ្ឌដទៃទៀត នៃរាជធានីភ្នំពេញ បានត្អូញត្អែរពី ភាពយឺតយ៉ាវរបស់អាជ្ញាធរមូលដ្ឋានចំពោះការដោះស្រាយបញ្ហាប្រឈមជូនពួកគាត់។ ប្រជាពលរដ្ឋ បានលើកឡើងថា ពួកគាត់មានការព្រួយបារម្ភចំពោះការបាក់មែក ឬរលំដើមឈើនៅតាមដងផ្លូវសាធារណៈមកលើលំនៅឋាន ឬមកលើខ្សែភ្លើងអគ្គិសនី ដែលអាចបង្កឲ្យមានគ្រោះថ្នាក់ជាយថាហេតុ។ ក្រុមប្រជាពលរដ្ឋ ក៏បានរិះគន់ពីភាពអសកម្មរបស់អាជ្ញាធរមូលដ្ឋាន ចំពោះការគ្រប់គ្រងផ្លូវ សាធារណៈមិនបានល្អ ដោយបណ្តែតបណ្តោយឲ្យយកចំណីផ្លូវទាំងនោះធ្វើអាជីវកម្មយ៉ាងអណាធិបតេយ្យ។

សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីចុងខែកញ្ញា កន្លងទៅនេះ បានជំរុញឲ្យសាលារាជធានីភ្នំពេញពិនិត្យឡើងវិញពីការយកចិញ្ចើមផ្លូវធ្វើអាជីវកម្មដោយខុសច្បាប់។ដើមឈើ និងចិញ្ចើមផ្លូវ ត្រូវបានចាត់ទុកជាសម្បត្តិសាធារណៈ។ ចិញ្ចើមផ្លូវ ត្រូវបានទុកសម្រាប់អ្នកថ្មើរជើង ចំណែកដើមឈើ ត្រូវបានរក្សាដើម្បីការពារបរិស្ថាន និងសោភ័ណភាពទីក្រុង៕