អ៊ីរ៉ាក់: ជនស៊ីវិលរាប់រយនាក់ ត្រូវបានសម្លាប់កាលពីថ្ងៃព្រហស្បតិ៍ ក្នុងការវាយប្រហាររវាងកងកម្លាំងរដ្ឋាភិបាលអ៊ីរ៉ាក់ និងពួកភេវរករ ISIS នៅជាយទីក្រុង Mosul។ តាមរបាយការណ៍ បានបញ្ជាក់ថា ក្រុមសកម្មប្រយុទ្ធ ISIS បានចាប់យកប្រជាជនធ្វើជាខែល ដើម្បីការពារខ្លួនពួកគេ អំទ្បុងពេលរត់គេចខ្លួន។ នេះបើយោងតាមរយ: សារព័ត៌មាន CNN ចេញផ្សាយនៅថ្ងៃទី ២២ ខែតុលា ឆ្នាំ២០១៦។

ប្រភពស៊ើបការណ៍សម្ងាត់មួយ បានឲ្យដឹងថា នៅមហាវិទ្យាល័យកសិកម្ម ភាគខាងជើងនៃទីក្រុងនេះ ក្រុម ISIS បានប្រើគ្រឿងចក្រឈូសកប់រាល់សាកសព ដែលបានស្លាប់នៅកន្លែងនោះតែម្តង។

មកទល់ពេលនេះ អង្គការសហប្រជាជាតិ កំពុងមានការព្រួយបារម្ភយ៉ាងខ្លាំង ខណ:ដែលពួកភេវរករ បានជម្លៀស ៥៥០ គ្រួសារមកពីទីភូមិនៅជុំវិញទីក្រុង Mosul ដើម្បីប្រើប្រាស់ពួកគេជាខែល សម្រាប់ប្រឆាំងនឹងការវាយប្រហារ របស់កងកម្លាំងអ៊ីរ៉ាក់ និងសកម្មប្រយុទ្ធឃើដ នៅក្នុងទីក្រុងធំទីពីររបស់ប្រទេសអ៊ីរ៉ាក់។

ទន្ទឹមនឹងនេះដែរ ពួកសកម្មប្រយុទ្ធ ISIS ថែមទាំងបានវាយប្រហារអគារសន្តិសុខ នៅក្នុងទីក្រុង Kirkuk ចម្ងាយ ១៧៥ គីឡូម៉ែត្រ (១០៩ម៉ាយ) ភាគអាគ្នេយ៍នៃទីក្រុង Mosul ផងដែរ៕